Regatistanan Rubiano a resalta riba e prome dia na e XIX Weganan Panamericano Santiago 2023

Diasabra tur tres Aruba su regatistanan, esta Just y Philipine van Aanholt, hunto cu Ethan Westera, a drenta awa na Algarrobo pa asina cuminsa na nan competencia pa loke ta e Panam Games 2023 na Chile.

Den e disciplina di ILCA 7 nos a haya Just van Aanholt a nabega dos biaha unda e ta keda na di 8 lugar den e prome race mientras den e di dos race Just ta keda na di 2 lugar. Just ta acumula un total di 11 punto.

Mester bisa cu esaki ta e di tres wega cu Just ta competi pa Aruba unda na e Weganan CAC 2023 na El Salvador e tabata medayista di Plata mientras cu den e Weganan Sur Americano Asuncion 2022, Just a keda na di 4 lugar.

Di su parti, Philipine van Aanholt ta ocupa un di 3 lugar den e competencia di Sunfish Femenino na Algarrobo.

Dos biaha e la ocupa e di tres lugar den dos race na Algarrobo, subsede di e Weganan Panamericano Santiago 2023. E regatista, Philipine van Aanholt a cambia di disciplina den e deporte di vela, mirando cu antes e tabata competi den Ilca7 mientras cu awor e ta nabega den Sunfish.

A pesar di e cambio, Philipine ta keda un di e regatistanan mas experiencia den e weganan aki. Philipine a demostra cu e por bataya den cualkier clase cu e competi den dje. E dos bes 3 lugar ta pone comodamente tres di Peru y Chile. Awor Philipine tin un total di 6 punto. Philipine van Aanholt ta dos bes atleta Olimpico y a logra un medaya di Oro pa Aruba na e weganan di Veracruz 2014.

Ambos Just y Philipine van Aanholt a bolbe mira accion na Algarrobo ayera.

Na mesun momento, Ethan Westera ta liderando e competencia di IQ Foil na e Weganan Panamericano Santiago 2023. E regatista Arubano a nabega contra un elenco di e 10 mihor atletanan di IQ Foil den e region America. Mester bisa cu Ethan a conoce un monster di prome dia unda e ta gana 3 di e 4 race nan. Su resultadonan tabata heat 1 na di dos lugar, heat 2 di prome lugar, heat 3 na di prome lugar y heat 4 na di prome lugar.

Den un reaccion chikito Ethan ta conta cu e dia pa bay bon p’e. E la sinti su mes confortabel den e race mientras tur cos a cana perfecto y na su fabor. Claro esaki ta e prome dia y tin algun dia mas pa bay.