Si bo a pasa banda di Kapel di Alto Vista diamars mainta, bo lo por a topa cu e palabranan ”Aruba Pro Pedofiel” y varios otro cos cu un persona desconoci a spuit riba e Kapel den mardruga. Riba rednan social sinembargo ta asumi cu Reginald Danies atrobe ta esun responsabel pa esaki mirando cu e la haci su mes responsabel pa tur e otro actonan di vandalismo den pasado.
”Esaki mi por bisabo, cu esey no ta ami a haci e. Dia bo wak candela den playa , esey ta ami. Mi a bisa bon duidelijk cu mi no ta bay uza spuit mas. Pakico culpami awo?” , Reginald Danies a comenta riba Facebook.
Bon Dia a papia cu Reginald Danies, kende ta un di e tata nan cu comunidad ultimamente a conoce pa motibo di su caso cu e tin basta tempo ta bringa pe. sr. Danies ta splica Bon Dia cu e la cay sera 10 dia anto e la buta tur cos den preto cu blanco y di esaki nan no kier papia.
”Ayera merdia mi a scucha riba radio den Pueblo na Palabra cu un homber a bisa e lo spuit for di Playa te cu San Nicolas, mi no sa kico ta e motibo si ”
Segun sr. Danies, ora cu e la bay sera e la wordo hiba pa papia cu fiscal anto nan a avise pa e laga e acusacion nan contra Minister Benny Sevinger un banda y pa laga nan trata cu Juancho cual lo bira e prome pedofiel cu lo haya 10 aña di castigo.
”Ami den otro banda no ta contento cu esey, pakico Juancho tin un abogado si nan a dicidi caba su sentencia? Mi a spuit cabay, mi a kibra Juancho su cas, mi a admiti na tur caminda cu mi a spuit y kibra anto nan no kier castigami pesey. Si nan castiga mi pa esaki bo lo mira dibiaha cu Benny tabata scapa e homber, e ora kico nan ta haci? Trece e fiscal cu tin e homber deteni y bisami pa mi calma y laga cos atras di lomba pasobra nan lo pidi 12 aña pa Juancho pa e haya 10. Normalmente bo mester caba cu e proceso pa e cana legal, awo bo ta bin bisami kico su sentencia ta prome cu finalisa e caso?Pakico nan a duna Juancho un abogado anto?” sr. Danies ta splica.
sr. Danies ta bisa cu e ta bay busca su manifesto bek pasobra dia 27 di April ningun hende no a trata cune manera debe ser. sr. Danies tambe ta agrega cu e ta bay haci un rueda di prensa e siman aki caminda e mes ta bay splica den detaye tur locual ta pasando y kico ta su siguiente paso si nan no yud’e, cu segun e, lo ta candela den playa.
