image.jpeg

Unabes cu reapertura di refineria lo tuma luga y e ta cuminsa opera debidamente, e sector maritimo ta bay come fei di e bolo aki tambe. 

Director di departamento Maritimo, sr. Carlyle De Coteau a declara na Bon Dia Aruba cu ora cu e refineria habri bou e maneho di Citgo, nan ta premira cu ta bay tin entre 40 pa 60 barco mas pa siman cu ta biniendo nos costa.

Pago pa tira anker 

E ta aclaria cu e barconan ey cu ta anker den nos awa maritimo prome cu nan ta drenta e refineria, nan no mester paga pa tira anker.  Sr. De Coteau a splica cu den ley ta para cu barconan cu ta destina pa Aruba, nan no ta paga. 

Nan ta haya un periodo di gracia di tres dia so, y nan por pidi pa extende esaki te cu tres dia mas.  Pero despues di esaki- segun director di departamento Maritimo,  nan tin cu cuminsa paga pa anker den nos awa .

Pero e presencia di mas barco ta nifica di otro banda cu agencianan maritimo ta bay haya mas trabou.  Pasobra e parti cu cada barco mester tin un agencia na Aruba cu ta representa nan si ta keda na vigor, el a bisa. “Si boto drenta na awa teritorial di Aruba bo mester tin un representante”, el a bisa.

Sr. De Coteau ta mira cu pa e sector maritimo e reapertura di e refineria lo ta hopi significativo pa nan.  Tambe otro sorto di compania di e sector maritimo manera esunnan cu ta haci mantencion of ta abastece nan cu cuminda, etc… lo beneficia di e actividad di e refineria.

Desaroyo di sector maritimo 

E ta calcula cu na 2015, e sector maritimo a produci entre 15 pa 20 miyon florin di entrada directo y indirecto pa Aruba. E suma aki nos mester mir’e cu no a sali fei di e saconan di pueblo di Aruba pa caha di gobierno, segun sr. De Coteau. Sino cu e ta un entrada cu nos pais ta haya den forma di divisa di afo. “Esey mi ta kere cu economia di Aruba mester pa crece. E tipo di divisa fuerte aki pa yuda en nos economia”,  el a declara.

Na final el a bisa cu ta existi un pleno confiansa riba nos sector maritimo, pero tambe riba proteccion di nos medio ambiente. Segun sr. De Coteau tur cos cu nan ta bin haciendo y e diferente proyectonan tin un linea cora cu ta coriendo rond di dje. Tur cos mester ta basa riba practica di conservacion di medio ambiente. “Nos ta controlando miho, y si algo cu nos ta kere cu no ta bay cu un bon proteccion di medio ambiente, e no ta bay sosode, pasobra nos ta bay tras di dje”, el a bisa na Bon Dia Aruba.

LEAVE A REPLY

Please enter your comment!
Please enter your name here