Den dianan aki, mayornan y studiantenan mes a cuminsa para den rij bou solo pa cumpra e carchi di Arubus aunke nan a wordo informa for di juni, tres luna prome cu scol cuminsa, cu e proceso tambe por bay di manera online.
Asina a expresa pa Bon Dia Aruba Sannin Daou ken ta fungi como PR di Arubus na unda a splica cu for di luna di juni nan a cuminsa traha y renoba carchi di studiante caba, aparte di e proceso den cual e persona por yega fisicamente na e puntonan indica di Arubus, tambe e proceso pa hacie di forma online ta disponibel.
“A traves di nos website, tur cos por bay online sin ningun problema, ora cu e persona ta wordo informa cu su carchi ta cla, e por scoge si e kier busk’e na San Nicolas, Playa, Arubus mes of na Aruparking”, el a indica.
E proceso online ta depende di e persona mes, na unda cu si e persona sa con pa traha riba internet y subi un file, e por bay mas lihe, segun Daou tin hende cu a hacie den un ora y tin otro cu a tarda dos of tres dia, ta depende con e persona ta tecnicamente.
“E persona mester saca un potret di su cara, si e potret ta bon e proceso ta sigui, si tin algun defecto ta bay haya un notificacion cu e potret no ta bon”, Daou a bisa.
Despues di esaki, e persona ta haya e notificacion di e pago cu tin cu haci’e via online tambe y e carchi por wordo traha mesora, pero e realidad ta cu igualmente tin personanan cu ta prefera di bay personalmente y para den un rij, algun biaha cu bao un solo basta fuerte pa asina mes nan por haya nan carchi di transporte.
