Sector mas dependiente di subsidio di salario ta e sector di ‘retail’; ta ora pa reinventa economia

Loonsubsidie of subsidio di salario na Aruba lo continua te fin di 2021, pero tin un tendencia positivo. Menos compania mester di e subsidio.

Contrario na e anuncio di Hulanda cu por para e pago di loonsubsidie pa islanan BES pa October 1, e areglo di subsidio di salario na Aruba ta presupuesta pa 2021 y lo continua por lo menos te cu fin di December, Director di SVB, ir. Edwin Jacobs a bisa Bon Dia Aruba. Pero e bon noticia ta cu e suma na subsidio di salario ta bahando structuralmente.

“Di 9.6 miyon florin cu a subsidia na Juni, e suma na loonsubsidie pa Augustus a baha te 7.8 miyon na Augustus. E cantidad di trahado cu ta ricibi loonsubsidie tambe a baha. Na Mei, 14.113 trahado a haya loonsubsidie y na Augustus, e cantidad tabata 7110. Na Mei, 1263 tabata depende di subsidio di salario y awor e cantidad ta 953,” Jacobs a informa.

E sector mas grandi cu tabata ricibi subsidio na Januari 2021 tabata di horeca, pero awor e ta na di dos luga. E sector cu mas ta depende di loonsubsidie ta benta por mayor y por detal, cu ta inclui tiendanan. Nan a ricibi 1.9 miyon florin na loonsbusdie na luna di Augustus, compara cu e sector di hotel cu a ricibi 1.2 miyon florin.

Locual SVB no por mira den e peticionnan pa subsidio ta si e salarionan di esnan cu no ta ricibi e subsidio a subi na nivel prome cu pandemia. Motibo ta cu e condicion pa haya subsidio di salario ta si locual e negoshi ta genera na produccion

Nivel di salario

Aunke e tendencia ta mustra un dependencia cu ta cay poco poco, e no ta nifica cu salarionan a subi. “Nos ta keda haya reclamo si cu dunado di trabao cu no ta bay na pago di 100 porciento di salario. Pero esey SVB no por bisa mucho riba dje, pasobra no tin bista den e empresanan mes.

E unico herment di SVB pa pago di loonsubsidie ta si e negoshi por proba cu e ta perdida den benta ta mas cu 25 porciento compara cu 2019. Si e cifranan ta indica cu e perdida ta menos cu 25 porciento, e empresario no ta bin na remarca mas pa subsidio di salario. Pues, no ta pasobra no ta pidi mas subsidio no ta nifica cu e operacion a yega na nivel di 2019, cu tabata e aña prome cu pandemia. E unico condicion cu e areglo di loonsubsidie ta mara na dunadonan di trabao ta cu e salario no por ta menos cu 60 porciento di e salario original. E cantidad di ora cu e trahado tin cu labora pa e salario aki ta depende di palabracion entre e dunado di trabao y su empleado. “E unico condicion di e loonsubsidie ta cu e salario no por ta menos cu 60 porciento di locual ta sigura na SVB,” Jacobs a splica.

Situacion laboral

Si mira e cifranan na SVB, pa loke ta trahado registra, dia 1 di September e total tabata 39.547 trahado. Compara cu comienzo di aña e ta 3.3% mas hende na trabao, pero ainda 4.9 porciento mas abao compara cu e periodo prome cu e pandemia. “E proyeccion ta cu e cantidad di trahado ta bay yega 40.700. E proyeccion ta basa riba e crecemento cu a calcula den e ultimo cuater lunanan. Si sigui asina lo yega na 42 mil trahado registra pa 2022, cu ta mas halto cu na inicio di pandemia. Pero nos ta kere si cu e salarionan lo no yega e nivel di 2019 na 2022. Nos ta sali afo di 5 porciento menos salario den averahe,” e Director di SVB a bisa.

Ola di contagio no a cambia proyeccion

Na SVB a kere cu e proyeccionnan di crecemento (y caida den dunamento di loonsubsidie) lo a para debi cu a drenta un periodo di medidanan adicional na fin di Augustus debi na e brote di COVID-19. A kere cu e lo afecta e benta na Aruba y cu e cantidad di necesidad pa loonsubsidie lo aumenta compara cu Juli, pero esey no tabata e caso.

Lo keda cu un grupo si cu kizas na 2022, cu kizas lo no por sobrevivi sin loonsubsidie y aki ta papia particularmente pa e sector di retail, esta tiendanan chikito cu ta bende particularmente souvenir na turista. Tur cos ta depende con economia desaroya y si e compania a reinventa su mes. “Si ta bon, tur compania mester a reinventa nan mes pa por opera den e economia nobo, los di subsidio.”

Restitucion di subsidio di salario

E subsidio di salario tabata un herment pa mantene cupo di trabao, sin esey no tabata posibel. Esey tabata e meta principal. Pero tabatin condicion stricto si, esta cu e compania ta registra na SIAD, ta paga BBO tur luna. A constata cu varios compania no ta haci esey y e consecuencia ta cu nan lo haya notificacion cu SVB lo cobra e subsidio back, te ora cu por prueba cu a declara tur obligacion na belasting. E pago di primanan social ta condicion pa por haya subsidio di salario. “Si mester constata den control cu e compania no ta cumpli cu esaki, SVB lo cobra e suma di subsidio back.”

Ta finalisando e punto aki lo manda e cartanan pa e companianan. Nan tin oportunidad pa entrega obhecion, cu nan a paga laat por ehempel. Pero nan mester cumpli cu belasting y algun no ta consciente di esey. Si nan no por paga e suma den un solo tiro, lo yega na un areglo di pago. No tin bista ainda di cuanto compania ta papia aki, pero “ e ta un grupo si,” Jacobs a bisa. “Nos tabatin poco problema tambe pa identifica cua compania tabata forma un unidad fiscal, bao di nan compania madre. Pero awor nos a aclaria esey y identifica nan cu ta haci e trabao mas facil.”

ATIA

Bon Dia Aruba a tuma contacto cu ATIA riba e tema di subsidio di salario. ATIA tambe a tende di 1 di October como fecha cu ta finalisa pago di subsidio di salario. Manera ir. Jacobs a mustra caba e areglo ta keda vigente te fin di 2021. Pero asina mes, Herrick Henriquez, Director di ATIA a bisa cu “awor a yega e proverbial ‘Ora di berdad.’ Tur comerciante tabata sa cu e loonsubsidie ta un ayudo temporal y cu e lo a stop un dia. Segun economia a cuminsa recupera den 2021 y companianan a cuminsa produci mas, e cantidad di subsidio di salario tambe a baha,” Henriquez a sigui bisa. “ATIA ta consciente si di e hecho cu tin compania cu no lo sobrevivi. Pero den nos opinion esey ta companianan cu kizas tabata tin problema cu nan ‘cash flow’ prome cu COVID-19 caba y nan no a tuma e oportunidad pa cambia strategia of ‘business model’ cu e ayudo di e loonsubsidie den 2020 y 2021,” tabata e comentario di Director di ATIA Herrick Henriquez.

LEAVE A REPLY

Please enter your comment!
Please enter your name here