Regla pa cu fondo di internet por pone prioridad riba areanan aparta den ciudadnan

(AP) – Ciudadnan na Merca ta treciendo dilanti preocupacionnan cu un regla nobo recien di President Joe Biden su administracion lo haci imposibel cu nan por haci uso di e 350 biyon dollar designa na ayudo pa alivia consecuencianan di coronavirus pa por expande na conexion di internet di velocidad mas halto.

Biden a pone un meta di sigura cu tur cas Mericano tin internet cu ta na un prijs rasonabel y cu velocidad halto. E plan di rescate Mericano masivo a tuma un paso dilanti pa cu e meta aki door di inclui un infrastructura di internet entre e usonan primordial di e suma designa pa e alivio di e pandemia, cu lo pasa door di tur ciudad, pueblo y estado.

Sinembargo, un regla interino publica pa e U.S Treasury Department a haci e posibilidad di bira eligibel pa ricibi esaki hopi mas chikito. E ta enfoca den areanan cu tin falta di un conexion stabiel y confiabel, cu ta conecta e dispositivonan na internet sea pa medio di un cable of liña di data, na un velocidad di descarga di por lo menos 25 megabyte pa seconde, y un velocidad di upload di por lo menos 3 megabyte pa seconde.

E rekisito aki ta sigura fondo pa e areanan mas scondi y aparta cu tin internet slow y varios biaha no tin internet mes, y tambe ta bay di acuerdo cu e definicion di ‘broadband’ dicta pa e Federal Commnications Commission den aña 2015. Sinembargo, ciudadnan ta den desacuerdo cu e rekisito pa por ta eligibel pa motibo cu segun nan, e no ta considera e necesidadnan actual pa cu internet.

Aunke mayoria di ciudadnan ya tin ‘broadband’ disponibel, e velocidad posiblemente no ta suficientemente lihe pa por sostene varios persona den un cas purbando di traha, studia y haci uso di entretenimiento na mesun momento, un situacion comun durante e pandemia di coronavirus. E prijs tambe por ta mas di loke casnan di menos entrada por paga.

“Basicamente nan ta poniendo prioridad riba e areanan mas aparta, na luga di e areanan urbano cu no merece esaki, unda cu tin mas poblacion,” segun Detta Kissel, un empleado retira di Treasury Department ken a yuda skirbi e reglanan di e agencia y aworaki ta boga pa miho internet den e area di Washington, D.C y Arlington, Virgnia.

Varios ciudad, incluyendo Washignon, Los Angeles, Milwaukee y San Antonio a somete comentarionan publico na e Treasury Department, urgiendo nan pa suavisa e rekisitonan pa por ta eligibel pa e uso di e suma pa alivio di pandemia den ‘broadband’. Algun kier e Treasury pa defini esunnan cu no merece esaki como tur cos cu ta menos di velocidad di download y upload di 100 megabyte pa seconde.

Esaki lo aumenta e cantidad di lugarnan eligibel pa e fondo di casi 11 miyon pa 82 miyon cas y negoshinan den henter e nacion, segun un investigacion conduci pa America’s Communication Association, cual ta representa e proveedornan di internet di escala chikito y mediano.

Ciudadnan ta argumenta cu e Treasury mester usa un rekisito di 100/100 megabyte pa seconde pa bira eligibel pa motibo cu esaki ta e mesun velocidad cu e areanan aparta lo mester yega si nan ricibi fondo. Un otro proposicion separa di infrastructura ta pasando den congreso, cual ta hopi mas flexibel, permitiendo un parti di e 65 biyon den fondo di ‘broadband’ ser duna na areanan cu “no merece’ cu no tin un velocidad di download di 100 megabyte pa seconde y upload di 20 megabyte pa seconde.

Si e Treasury sigui dilanti cu nan regla manera originalmente skirbi, areanan cu ta poco popula y actualmente tin falta di ‘broadband’ por ricibi velocidad di internet mas halto cu e otro areanan urbano. Y algun alcalde no ta de acuerdo cu esaki.

Residentenan di casi tur caminda na Milwaukee ya caba tin acceso na por lo menos un proveedor di internet ofreciendo velocidad di download na 25 megabyte pa seconde y velocidad di upload di 3 megabyte pa seconde. Pero den otro partinan di e ciudad, menos di mita di e casnan ta haci uso di e servicio di internet pa causa di su prijs, segun David Henke, e ciudad su hefe di oficial di informacion.

“Si bo no tin un trabao y bo no por paga ‘broadband’, esaki ta bira un sorto di ciclo,” Henke a bisa. “Bo ta keda fuera di trabao na cas, estudio na cas, telemedicina y basicamente di participa den sociedad moderno.”