(AP) — Reina Elizabeth II a dicidi di no pasa Pasco na e propiedad real di Sandringham na oriente di Inglatera memey di preocupacion pa e transmision rapido di e variante Omicron di e coronavirus.
E palacio a bisa ayera cu e reina di 95 aña di edad ta bay pasa e dianan festivo na Windsor Castle, west di London, unda el a keda mayor parti di e pandemia. Ta spera cu otro miembronan di famia real ta bay bishita den temporada di Pasco, tumando precaucionnan contra transmision di e virus.
Infeccionnan di coronavirus ta aumentando na Reino Uni – un aumento di 60 porciento den un siman – mientras Omicron a reemplasa Delta como e variante dominante, y prome minister Boris Johnson a bisa cu por tin mester di introduci mas restriccion nobo pa baha velocidad di transmision. Su minister di Salud a nenga di descarta e posibilidad di medidanan nobo prome cu Pasco.
Pa varios aña, miembronan extendi di famia real Britanico ta pasa e dianan festivo na Sandringham, unda multitudnan ta reuni pa mira nan atende e iglesia local riba dia di Pasco di Nacemento. E reina a reduci su biahe y trabao desde cu a pasa un anochi den hospital na october, y su dokternan a bis’e pa descansa. Desde e tempo ey el a asumi debernan liviano, incluyendo audiencianan virtual cu diplomaticonan y combersacionnan semanal cu prome minister.
Esaki ta e prome Pasco di e reina desde fayecimento di su esposo di 73 aña, Prins Philip, na april cu 99 aña di edad. E pareha real a pasa nan ultimo Pasco hunto na Windsor aña pasa.
