Reina di Carnaval 70, Gedis Jansen: “Mi inspiracion y motivacion sigur tabata mira cuanto hende ta kere den mi y mi potencial”

Dia 14 di januari Aruba a conoce su di 70 Reina Grandi di Carnaval cu a keda den persona di Gedis Jansen, representante di TOB Carnival Group. Den un entrevista cu Gedis, e ta conta di su mes y di su participacion den eleccion di reina di carnaval.

BDA: Bo nomber y funcion

GJ: “Mi nomber ta Gedis Jansen, mi tin 24 aña di edad y actualmente mi ta un nail technician y

Make-up artist.”

BDA: Conta nos un poco di bo mes, bo background, hobbies, estudio etc.?

GJ: “Mi ta bin di un famia humilde di cual mi ta e unico yiu muhe memey di dos yiu homber. Mi

hobbies ta consisti ta modela, inventa cu make-up riba mi mes y socialisa cu mi famia y

amistadnan cercano. Mi a caba mi MAVO y mi HAVO y mi ta desea di sigui cu mi estudio

aki nan mes na Universidad di Aruba den e facultad di economia.”

BDA: Esaki tabata prome biaha bo ta participa den eleccion di carnaval?

GJ: “Si, esaki ta mi prome biaha participando den un eleccion di carnaval.”

BDA: Kico a inspira bo of motiva bo pa participa den eleccion di reina?

GJ: “Mi inspiracion y motivacion sigur tabata mira cuanto hende ta kere den mi y mi potencial y

sigur tambe ta e deseo cu mi semper tabatin scondi di chikito pa mira un representacion di

mucha muhe nan manera mi riba e escenario di Reina aki na Aruba.”

BDA: Con bo preparacion tabata pa eleccion?

GJ: “E tabata uno hopi leuk pero sigur cu stress, hopi nervio. E tabata sigur un desafio pa mi

mes den tur aspecto, pero principalmente mental. Presenta un show y un speech unda ami ta

e punto focal no tabata algo cu mi ta gusta haci, dus mi mester a prepara mi mes hopi pa e

momento nan aki.”

BDA: Bo a verwacht cu bo lo bay cu e titulo maximo? Con e reaccion y sentimentonan

tabata ora cu bo a wordo corona como reina di carnaval 70?

GJ: “Full mi preparacion mi a hinca den mi cabes “ora mi keda corona como Reina 70” y no “si mi keda corona como Reina 70”, pero e momento di saca 1st Runner Up mi tabata cla pa esaki

tambe. Algo cu a haci e momento cu mi a realisa mi ta Reina 70 di berdad uno cu mi a sinti super orguyoso di mi mes cu mi a saca cara pa asina hopi hende cu mi a gewoon cuminsa bula riba e escenario bringando tur e gana nan di cuminsa yora di felicidad cu mi tabatin e momento ey.”

BDA: Kico ta bo mensahe pa comunidad di Aruba?

GJ: “Semper kere den bo mes! Bo tin tur e capacidad di logra tur loke bo pone den bo mente.

Momento cu bo dicidi di bay tras di loke abo kier sin importa cuanto hende ta bisa bo pa no

haci esaki bo ta bay ta asina orguyoso cu bo a haci esaki sin importa e resultado.”