Reino Uni lo prohibi benta di autonan nobo di diesel y gasolin pa aña 2030, un decada prome cu su compromiso anterior, e prome minister a bisa diamars.

Boris Johnson a haci e promesa como parti di plan pa un ‘revolucion industrial berde’ cu e ta bisa lo por crea hasta 250mil cupo di trabao den energia, transporte y tecnologia.

Gobierno a bisa cu benta di auto y van di gasolin y diesel nobo lo termina na 2030, maske por sigui bende vehiculonan hibrido te cu 2035.

Fabricantenan di auto a expresa preocupacion pa cu e meta, bisando cu e meta anterior di 2040 ya tabata ambicioso.

E plannan berde di gobierno tambe ta inclui inversionnan den energia di hidrogeno y tecnologia di captura di carbon, y un ambicion pa genera suficiente energia di biento pa abastece tur hogar Britanico pa 2030. Decepcionando algun ambientalista, plannan tambe ta inclui un generacion nobo di plantanan nuclear.

E empuhe ambiental ta parti di esfuersonan di Johnson pa bay mas leu di e temblornan di pandemia di coronavirus y e salida divisivo di Reino Uni for di Union Europe, y pa trece cupo di trabao nobo na regionnan ex-industrial den Inglatera central y nort.

Johnson tambe a haci un compromiso comparti pa combati cambio climatico como parti di su acercamento na Joe Biden, mientras e ta purba di convence e presidente electo Mericano cu e no ta un copia di Donald Trump, kende a bagatelisa e menasa presenta pa kentamento global.

Reino Uni ta programa como anfitrion di e conferencia di clima global COP26 otro aña, despues di un retraso di 12 luna pa motibo di e pandemia. Reino Uni tambe a priminti di reduci su emisionnan di carbon na net cero pa 2050.

Rebecca Newsom di Greenpeace UK a bisa cu e anuncio tabata un stap grandi bay dilanti, maske el a lamenta e inclusion di ‘solucionnan speculativo manera nuclear y hydrogeno di combustibel fossiel, cu no lo trece nos na cero emisionnan pronto, of nunca’.

 

LEAVE A REPLY

Please enter your comment!
Please enter your name here