Futura Lab a duna hopi sosten na diferente organisacion y creacion di idea, pero e intencion ta pa innovacion pasa den man di un Direccion di innovacion. Esey ta describi den e relato anual di Ministerio pa Asuntonan General cu a keda presenta na Parlamento y publico. E relato ta describi e trabaonan di Prome Minister Evelyn Wever Croes y e Ministerionan cu ta resorta bao di dje. Un di nan ta e contribucion di Aruba Futura Foundation, miho como si como Futura Lab.

Futura Lab ta ehecuta proyectonan specifico di innovacion riba instruccion di Ministerio pa Asuntonan General, y ta sosteni pa e team di innovacion di e Ministerio y e relato anual a ilustra e trabao di e fundacion.

Rijbewijs nobo y inter-operabilidad

E esfuersonan pa innovacion ta sosode diariamente den e departamentonan y direccionnan. E aspecto mas yamativo ta e digitalisacion di e procedura pa otorga e rijbewijsnan nobo, cu a keda tuma pa e Servicio di Registro Civil. Door di cu e servicio a tuma e proyecto aki y pa motibo di digitalisacion a hisa e siguridad y confiabilidad di e rijbewijs, como tambe e precision con ta traha e rijbewijs. Door cu e citanan ta sosode digitalmente, ciudadanonan ta perde menos tempo (red. Mester bisa cu e sistema automatisa di Censo y Registro Civil ya tabata existi caba despues di a haya financiamento di FDA).

E enfoke di e-Government ta pa mehora e dunamento di servicio na ciudadano y mehora e experiencia di e ciudadano cerca e servicionan publico. E prome paso tabata e publicacion di e e-Government Road Map na 2020, unda a cuminza cu e standarisacion y digitalisacion di e procesonan nucleo denter di Gobierno. E proceso multi-anual lo amplia e eficiencia y transparencia denter di administracion publico. A nota e balor particularmente awor durante e crisis di COVID-19. Futura asina a lansa un proyecto piloto hunto cu e e-commissions di Gobierno pa yega na un cuadro di interoperabilidad.

Como parti di e lansamento di e plataforma aki, lo evalua un medio di identificacion digital, incluso un number nobo y unico di ciudadano cu lo keda uza pa tur servicio di Gobierno.

Locual a logra cu e plannan di e-Government, esta e proyectonan di digitalisacion ta cu Direccion di Asuntonan Economico, Comercio y Industria, DEHZI a digitalisa e proceso di registracion pa licencianan di empresa na 2020. Meta ta pa agilisa e proceso di solicitud, incluso aprobacion y flohonan di documentonan digital pa yega na e ‘Ease of doing Business’ (facilidad pa haci negoshi) y facilita e reactivacion di economia. DEHZI a tuma un paso grandi pa yega na 100 porciento digitalisacion, y ta considera un logro grandi den e trayecto di e-Government.

Happy Flow

E crisis di COVID-19 a enfatisa e balor di biahamento cu menos contacto posibel y como tal lo evalua e funcionamento di e Happy Flow na Aeropuerto di Aruba, pa sostene e normal nobo. Lo traha cu tur actor envolvi y a base di e lesnan cu a siña di e sistema lo participa na plataformanan internacional y gruponan di trabao, manera e Seamless Traveler Journey Program. Mester bisa cu FDA a financia e creacion di Aruba Happy Flow.

Innovacion Social

Pa desaroya un economia innovativo mester desencadena e capacidad di innovacion di e ciudadano. Aki ta pensa riba introduccion di programa y proyectonan cu ta dirigi riba stimula creatividad y amplia e capacidad di conocemento di e Arubiano. Asina tin algun proyecto cu a inicia na 2020 manera e cooperacion cu Aruba Youth Impact Cafe, AYIC. E ultimo aki ta dirigi pa e Heart Centered Leadership Foundation, HCLF cu tin 12 aña caba ta asisti hobennan na Aruba pa bira lidernan cu ta consciente, cu integridad halto. HCLF ta activo na scolnan, organisacionnan di hobennan, docente y ta duna man na mayornan tambe, y ta traha cu e EduCare Foundation di California. Futura Lab kier sostene e organisacion aki pa stimula e hobennan mes pa bin cu solucionnan creativo pa retonan. E enfoke na 2020 tabata riba digitalisacion di tayernan y lecturanan.

Tambe Futura Lab ta traha cu e iniciativa Happy to Give Back pa medio di introduccion di e armbandnan colorido como parti di e campaña di conscientisacion pa tene distanciamento social.

Scol digital

Futura Lab a hunto cu otro partners a yuda Scol Cacique Macuarima pa keda ekipa cu tur e necesidadnan digital pa e proyecto e-Learning. Esaki despues cu e scol a perde tur su material debi na un candela grandi. E scol ta parti di e proyecto piloto pa siñamento digital. E di dos fase di e proyecto piloto a cuminza na 2020, na Colegio Pastoor Kranwinkel cu a haya 13 e-boards, danki na colaboracion cu otro instancianan. E scol a cuminza cu e proyecto e kwartaal aki.

Futura Lab a drenta den un cooperacion cu SKOA na januari 2020 pa un mision di ‘Train the Trainers’ cu a tuma luga na London. Aki e docentenan y coachnan a explora tecnologianan y metodonan nobo, pa aplica na siñamento digital. Segun Futura Lab, a ripara con e grupo aki a comparti nan conocemento cu a haci cu e inversion aki a crece exponencialmente.

District 297

Lo sigui traha pa conecta tur Arubiano bibando den exterior cu posibilidadnan local, ademas cu e organisacion mes, District 297 a organisa un total di cinco webinar interactivo pa discuti temanan cu ta brinda perspectiva pa Aruba.

Futura Lab a sostene Maria College den creacion di un curiculo pa por organisa un Feria di Ciencia na 2020. E team di Futura Lab a duna un presentacion riba e tema ‘Built with Nature’ (traha cu Naturalesa). E idea ta pa e alumnonan di klas 3 di Maria College MAVO presenta proyectonan pa e Feria di Ciencia riba e temanan biodiversidad, energia, cuminda, awa, biahamento y material. E proyecto mester conclui na Maart, cu evaluacion di e proyectonan y premiacion.

Tambe a traha riba e proyecto di Realidad Virtual hunto cu Aruba Excellence Foundation, unda a percura pa e brilnan pa realidad virtual cu ta duna un tour di Aruba.

Empresaria

Un elemento crucial pa un ecosistema di innovacion cu ta florece ta presencia di empresarionan exitoso. Meta ta pa crea y stimula e mentalidad di empresario, ademas di e clima di empresaria. Asina a bin cu un iniciativa nacional pa identifica 100 proyecto innovativo, y kier duna e participantenan e confianza cu nan ideanan ta conta y cu lo keda desaroya. Ta trata di ideanan pa trece solucion pa comunidad di Aruba. A presenta 112 idea y ya a identifica 54 cu danki na cooperacion di expertonan lo por bira un plan cu ta implementabel. E participantenan ademas ta exponi na introduccion di programanan necesario, manera maneho di proyecto, mercadeo, desaroyo di balor, y maneho financiero den e asina yama 100 Innovations Academy. Den futuro, ciudadanonan tambe por sigui cursonan virtual pa medio di e plataforma di e academia aki.

Aruba Activa

Futura Lab a lanta Aruba Activa na 2020, cu ta un plataforma pa ‘crowdfunding’ unda participantenan por expone nan proyectonan y genera fondo pa ehecuta esakinan. E ta un sistema pa genera fondo pa proyecto, te na un maximo di 5 mil florin pa proyecto. Lo lansa Aruba Activa e aña aki.

Sociedad Sabi

E meta ta pa crea mas cooperacion entre e sector publico y priva y tambe ciudadanonan, pa ta consciente di e beneficio di un economia circular. A base di e pensamento aki a bin cu e AREA cu ta Aruba Re-Imagined Areas cu ta un plataforma di innovacion pa realisa posibilidadnan den diferente districto rond Aruba, pa stimula actividad economico y hisa calidad di bida den e areanan aki. Na 2020 a organisa actividadnan na Oranjestad, manera anochi di cinema y accion di carnaval den cooperacion cu e tiendanan. E pandemia a pone cu a dicidi pa crea un fundacion cu mester yuda maneho di Centro di Oranjestad, cu ta e Fundacion Centro Maneho Oranjestad (Stichting Centro Beheer Oranjestad). Mester a busca candidatonan adecuado pa drenta e directiva y pa nan por finalisa e plan di negoshi. Un di e logronan ta tiendanan boutique nobo na fin di Caya Grandi, ademas di apartamentonan. Stichting Centro Beheer Oranjestad lo tuma e tareanan di AREA na 2021 pa centro di Playa.

Innovacion den tempo di COVID

Basa riba e impacto di COVID-19, Futura Lab a cambia su prioridadnan den deliberacion cu partnernan pa enfoca su esfuersonan pa sostene Gobierno y gremionan den e crisis. Mirando cu Futura Lab ta un organisacion dirigi riba digitalisacion, e por a crece bira un laboratorio di innovacion y a duna Gobierno e capacidad laboral pa yuda Gobierno enfrenta e crisis.

Asina a lanta un Crisis Innovation Lab pa sosten general, sostene DVG cu coordinado di crisis y aparatonan tecnico, institucion di teamnan pa produci material di proteccion contra transmision di e virus, conseho riba digitalisacion relaciona cu enseñansa, campañanan di conscientisacion,y investigacion di posibilidadnan di Telemedicina.

Finalmente a cuminza cu e trabaonan pa institui un Direccion di innovacion. E proyecto awor aki ta den su ultimo fase, pa percura cu e Direccion aki por cuminza funciona na 2021. Unabes operacional, e Direccion di innovacion lo percura pa e coordinacion di e proyecto di e-Government, como tambe e coordinacion y ehecucion di e Masterplan ‘Reposicionando nos Belanan.’