Republica Dominicana: Abinader ta manda advertencia na ONU y ta urgi pa entrega di recursonan pa mision na Haiti

(DiarioLibre) – E presidente Luis Abinader a lansa un advertencia pa e comunidad internacional for di e escenario di e Organisacion di Nacionnan Uni (ONU) dilanti e indiferencia di e paisnan di mundo na su yamada pa financia e mision di paz pa Haiti.

Den un declaracion na prensa, despues di su ponencia dilanti e Conseho di Seguridad di ONU, e mandatario Dominicano a dirigi un mensahe energico na e comunidad internacional.

“Awe mi kier adverti e comunidad internacional cu Republica Dominicana ta bay sigui lucha cu tur su forsa pa evita di wordo lastra na e mesun abismo cu Haiti. Nos slogan, di awe pa dilanti ta bay ta: Of nos ta lucha hunto pa salba Haiti of nos ta lucha nos so pa protege Republica Dominicana”, e hefe di Estado a adverti.

Abinader a agrega cu su pais ta haya su mes obliga pa duna e paso aki mirando e buelta cu a situacion interno di Haiti a dal cu e entrada di actornan paramilitar nobo cu ta empeora e conflicto existente.

E mandtario a urgi, di manera fuerte, na e lidernan di mundo, pa facilita e placa cu tanto biaha a wordo priminti y pa pasa di promesa pa accionnan.

“Republica Dominicana no ta duna Haiti loke ta sobra, si no cu e ta aporta loke e falta. E tempo di e promesanan a caba, cuminsando desde awe nos ta drenta den e momento di accionnan. E placa ta aparece aworaki of e colapso di Haiti ta bay ta ireparabel. E colapso lo ta un menasa pa nos y pa e region,” presidente Abinader a manifesta.

E presidente Dominicano a insisti na varios ocasion den e empeoramento di e situacion di inseguridad na Haiti cu a duna origen na e surgimento di movimentonan paramilitar, manera esun di Guy Philippe.

“E resultado ta cu awe Haiti, cu un gran parti di su teritorio controla pa bandanan criminal, ta den e borde di un guera civil. Na esaki mester agrega tambe un ingrediente di mas stabilisacion, genera pa gruponan paramilitar y politico cu ta pretende di presenta nan mes manera e salbadornan na un pais cu ta anhela seguridad, alimento y paz,” el a remarca.

Abinader a reclama na e comunidad di paisnan representa na ONU e indiferencia cu nan a mustra pa e situacion, cada biaha pio, di e sociedad Haitiano.

“For di September di 2021 nos gobierno ta bini ta denuncia na diferente organo di Nacionnan Uni e deterioro continuo di e condicionnan social na Haiti. Lamentablemente, e situacion grave di e pais bisiña no a wordo atendi cu e urgencia y contundencia cu e merece,” el a critica.

Despues el a bisa na e comunidad internacional cu e no por permiti e tragedia Haitiano continua ni un dia mas.