ORANJESTAD – Consulado Dominicano na Aruba ta trahando pa fortalece e lasonan comercial cu nos isla. Actualmente un delegacion di comerciantenan local ta preparando pa biaha awe pa e isla Caribense aki. Adicionalmente kier fortalece e laso di familiaridad cu Aruba, ya cu tin dos compania aereo caba cu ta cubri e ruta entre Sto. Domingo y Oranjestad cu cinco vuelo pa siman.
Vice consul Dominicano y encarga cu e gestion comercial aki, Edward McCollum a declara cu “e cosnan cuminsa draai caba y pronto nos ta bay tin un sistema di comercio fructifero.” Republica Dominicano ta interesa riba e mercado di Aruba cu ta nifica 3 mil miyon Dollar anual den importacion; un mercado importante ya cu Aruba practicamente ta importa tur cos.
El a anuncia cu mañan nan ta biahando cu e delegacion mas grandi di empresarionan cu ta bay participa den e evento Hub Camara Santo Domingo. E ta un delegacion di 18 empresa dispuesto pa estrecha e relacion di comercio bilateral. Nan ta di diferente sector, entre nan construccion, comestibel, industria, salud, etc… Nan lo wordo exhibi den e expo aki.
Nan ta bay haya oportunidad di haci negoshi pa exporta y/of importa di Republica Dominicana pa Aruba y vice versa, segun McCollum. Ya caba el a bisa cu den menos di dos luna tur esfuerso cu nan a haci lo wordo concretisa. Un barco lo cuminsa directamente pa trece productonan Dominicano pa nos isla. Tur hende interesa por tuma contacto cu e consulado Dominicano.
Igualmente tur dia ta yega Aruba un vuelo comercial for di Republica Dominicana cu piesanan di auto, frutanan berduranan. E ta un forma pa abastece nos isla cu productonan agricola di prome necesidad na bon prijs y calidad. E ta argumenta cu no tin awacati, mango y papaya mas dushi cu esun di Rep. Dominicano. E ta haya cu Republica Dominicano por abastece Aruba di fruta y berdura di calidad y barata, pero tur cos ta depende di e comerciante interesa pa faborece nos pueblo. “Ami ta percura pa e barco y nan ta percura pa bin cumpra e productonan di Republica Dominicano,” el a sigura.
El a laga sa cu seis aña pasa Republica Dominicana tabata exporta 500 pa 700 miyon Dollar pa aña. Na aña 2018, e mesun pais Caribense aki a exporta 11 mil miyon Dollar; un aumento di 2 mil porciento den un par di aña.
Tambe nan a mehora nan infrastructura. Dubái Port International a construi un waf moderno cu un inversion di 2 mil miyon Dollar na Republica Dominicana. E inversion aki no ta por nada –segun McCollum- ya cu Republica Dominicana ta birando e principal distribuido di productonan alimenticio pa tur region di Caribe.
McCollum a haci un yamado pa tur comerciante grandi y chikito interesa riba e variedad di producto cu su pais ta ofrece por tuma contacto libremente cu e consulado Dominicano na Aruba. E ta un forma pa trece productonan basico di prome necesidad na prijs mas economico pa ofrece mas barata na nos comunidad. “Merca ta mucho leu y su productonan ta mucho caro na momento cu ta yega akinan,” el a bisa.
Na luna di mei lo wordo organisa un evento bou e nomber di Agro Alimentaria 2019, unda tur productor di Republica Dominicana lo ta presente pa expone nan productonan. Esaki ta un oportunidad pa tur isla di Caribe por bin haci negoshi directamente cu e productornan mes.
McCollum ta encurasha tur comerciante local pa asisti na e evento aki. Via website di Agro Alimentaria 2019 nan por registra nan mes pa atende e evento aki. Te hasta e consulado Dominicano lo percura pa su gobierno paga e hotel di e delegacion interesa pa bishita e feria aki.
