Pa yuda e pais den su lucha pa frena e pandemia di Covid-19, gobierno di Merca a traves di e Agencia di Estadonan Uni pa Desaroyo Internacional (USAID), y Comando Sur Mericano, a haci entrega na Republica Dominicana di 50 ventilador y 2 hospital mobil.
E donacion a ser entrega pa embahadora di Merca na e pais, Robin S. Bernstein, y ricibi pa vice-presidente y coordinador di e Gabinete di Salud, Raquel Peña, pa Mayor General Juan Manuel Mendez Garcia, director di e Centro di Operacion di Emergencia (COE) y pa Mario Lama, director di Servicio Nacional di Salud (SNS).
E embahador a sigura cu hunto cu Comando Sur di forsanan arma di Merca nan ta fortaleciendo e asociacionnan y dunando prioridad na region di Caribe, pa enfrenta e menasa di e coronavirus. E cooperacion ta consisti di asistencia humanitario manera e donacion di e hospitalnan y equipo di proteccion persona na varios parti di e pais. Bernstein a resalta cu su prioridadnan na e pais ta sigui concentra den seguridad, den inversion, comercio y educacion.
Den su palabra di gradecimento e vice-presidente Raquel Peña a expresa cu e muestra di solidaridad aki ta di gran ayudo pa cumpli cu e metanan estableci pa gobierno di presidente Luis Abinader.
E valor total di e donacion ta di US$ 950.000, banda di US$3.7 miyon na asistencia sanitario destina na e lucha contra Covid-19 na e pais. Republica Dominicana ta e caso mas grave den region di Caribe cu casi 100.000 caso confirma y riba 1.800 morto.
