Rapper ganado di Grammy, residente tin colaboracion nobo den su proximo album: cientificonan. E entretenedo Puertoriqueño a bisa cu el a studia cu profesornan na Yale University y New York University pa lesa patronchi celebral den bichi, raton, macaco y hasta Bad Bunny pa crea su segundo proyecto solo.
Daniel Alfonso Colon-Ramos, un profesor asocia di neurociencia na Yale, a bisa cu Residente a pasa algun dia na e scol investigando. “Nos tabata joke cu nos mester a dun’e un diploma.” Riba campus, nan a uza test di electroencephalogram (EEG) riba bichi pa track y graba patronchi di ola celebral, sin haci daño na e animalnan. “Ta resulta cu ora neuronanan comunica cu otro nan ta uza ritmo – yama ritmo di actividad. Na final di dia, e ritmonan aki por wordo converti den musica.”
E album lo sali na november. Residente, naci Rene Juan Perez Joglar, a traha cu Suzanne Dikker, un investigado senior na departamento di psicologia di NYU, pa uza EEG test riba su mes y Bad Bunny pa produci e prome single di e album, ‘Bellacoso’.
E cantica ta un retorno na e rais di reggaeton di Residente, y e colaboracion cu Bad Bunny, naci Benito Antonio Martinez Ocasio, tabata un sorpresa, ya cu Residente, di 41 aña di edad, ta conoci pa rap politico, di husticia social y topiconan relaciona, y ta critico di e generacion hoben di strea di trap Latino como tambe e popularidad di zonido di reggaeton.
“Mi kier a demostra cu maske nos ta diferente, nos por conecta cu otro cu nos frecuencia celebral”, Residente a bisa. “Mi sa cu mi fanaticonan no ta compronde pakico mi ta colaborando cu Benito. Mi kier a mustra nan cu maske nos ta diferente, nos por conecta.”
Residente a bisa durante e test di EEG cu e y Bad Bunny ‘tabata mirando un muhe balia, tabata bebe y nan tabata capturando e frecuencianan ey’.
E video colorido pa “Bellacoso” – cu un grupo di homber y muhe ta twerk – ta inclui modelo di varios tamaño y color. Residente a bisa cu diversidad den musica y film ‘semper ta importante’.
