Mayoria scol cu a haya airco ta na San Nicolas. Asina Minister di Enseñansa, Rudy Lampe, a bisa dunando contesta na e serie di preguntanan cu el a haya durante e reunion publico pa culmina cu e control di e reportahe financiero di e prome seis luna di presupuesto 2019.
Tambe el a informa Parlamento cu algun scolnan estableci na Playa y otro na Santa Cruz a bin haya airco. E modulonan cu nan a pone extra na Colegio San Hose, tur tin airco. Aunke tin un discrepancia –segun e mandatario- ya cu otro parti di e scol aki no tin airco.
E mandatario a laga sa cu poco poco nan ta cumpliendo cu e lista di scol cu mester di airco. E ta reconoce cu airco no ta un luho mas pa nos sistema di enseñansa. Ademas, e ta haci un diferencia grandi pa mehora e concentracion, tanto pa e muchanan como pa e docentenan.
Enseñansa y Horeca
Pa loke ta e studiantenan di Horeca -segun e mandatario- te hasta por wordo papia di un aumento di hobennan cu ta scoge pa tin un formacion riba e tereno aki di hospitalidad.
Pa prome biaha den nos curriculum y sistema di enseñansa, e parti cu tin di haber cu industria di turismo, a drenta nos scolnan. El expresa cu ATA a yega di destaca e echo aki, y e mes ta haye positivo pa cultiva e interes bou nos mucha y hobennan. Tambe esaki ta habri oportunidad pa nan scoge un carera den e sector hotelero, cu te aworaki, ta nos unico pilar economico.
