(NLTimes) –Susha bo man y resolve e problemanan causa pa teremoto na Groningen rapidamente; igual di generosamente cu a gasta e biyones di ganashi di extraccion di gas. E Groninger Bodem Beweging (GBB) a haci e apelacion aki ayera den un aviso den tres corant nacional – AD, Trouw y Volkskrant.

Nuebe aña riba e dia cu e teremoto severo, di magnitud 3.6 cerca di Huizinge, GGB a hala atencion na e problemanan cu residentenan ainda ta enfrenta.

Despues di e teremoto na 2012, investigadornan a conclui cu teremotonan por bira mas severo den futuro pa motibo di extraccion di gas. Pa reduci e cantidad di teremoto den futuro, mester extrae e menor cantidad di gas posibel. Hasta awo cu e gas tap na Groningen ta cera, e problemanan ta continua, tabata e mensahe di GBB. “Ya for di februari 2013, e minister di Asunto Economico e tempo aya, Henk Kamp a considera necesario pa reforsa casnan. Casi nuebe aña despues, sinembargo, menos cu 8 porciento di e 26,844 cas den e operacion di refuerso realmente a wordo reforsa.”

A haya mas y mas cas daña. “Nos ta papiando di un area cu 150mil cas y 250mil residente. Na 2016, ingenieronan a haya cu virtualmente ningun cas den centro di e zona di teremoto tabata suficientemente fuerte pa resisti un teremoto magnitud 5.0. E sentimento aki di constantemente biba den inseguridad a causa miedo y rabia den hopi persona. Diripiente, doñonan di cas a ripara cu nan cas a bira uno cu no por bende. Residentenan cu a sufri daño tras daño y mester a bringa pa compensacion pa esaki a sufri problema di salud”, segun GBB a bisa den e aviso.

E operacion pa reforsa edificionan ta bayendo poco poco. “Un gran cantidad di persona ta bay tin mester pa warda dies aña na e velocidad actual di refuerso prome cu ta nan turno.”
Esaki ta inaceptable, y tur motibo pa bati alarma, segun GBB. “No enfoca solamente riba residentenan riba papel pero tambe den realidad. Nos ta exigi pa calcula menos y haci mas pa resolve e problemanan. No ta aceptabel pa hende ta den incertidumbre pa otro diescinco aña.”

E organisacion kier, entre otro, pa reserva ‘suficiente capacidad di construccion’ pa Groningen. “Habitantenan di Groningen no ta victima di un desaster natural, pero miles di residente ta victimisa pa extraccion iresponsabel di gas bao di nan cas y pa un subsecuente politica di gobierno fracasa cu ainda ta continua”, e grupo a bisa.

LEAVE A REPLY

Please enter your comment!
Please enter your name here