Un coleccion historicamente valioso awor ta den restauracion. Esaki ta ta trata di documentacion di e añanan 1822 – 2015, cual ta e archivo di Kerki Protestant di Oranjestad.
Den un relato di Fundacion Amigonan di Archivo (ADA), e fundacion ta conta e storia tras di esaki:
Nan a wordo acerca pa Archivo Nacional Aruba (ANA) cu e proyecto titula Dos siglo di Protestantismo. E proyecto a wordo desaroya relaciona cu e archivo di e Kerki Protestant di Oranjestad cu a wordo hiba na ANA.
Ta trata di documentacion di un periodo di 193 aña. E cantidad di archivo ta 22 metro, cu ta igual na 154 caha di archivo. E proyecto ta desaroya pa ANA y ta dirigi riba dos aspecto, esta pa haci e comunidad mas consciente di e necesidad, balor y importancia pa conserva documento di balor historico y cultural como parti di nos herencia nacional. Y di otro banda yega na ehecuta un plan di restauracion y conservacion di documentonan. E condicion fisico di e documentonan ta den un estado avansa di decadencia, pa cual nan mester wordo restaura pa evita cu nan ta deteriora mas y asina perde informacion.
Financiamento
Pa falta di material pa ehecuta e plan di restauracion, Fundacion ADA a wordo acerca pa un sosten financiero pa por cumpra e material necesario. Fundacion ADA na su turno a acerca Prins Bernhard Cultuurfonds Caribbean, cu e proyecto aki, pa solicita e sosten financiero pa asina yuda cubri e gastonan di e material di restauracion pa por realisa e trabounan. E materialnan ta hopi specialisa y no ta obtenibel na Aruba. Despues cu Fundacion ADA a haya aprobacion di e proyecto for di Prins Bernhard Cultuurfonds Caribbean, a ehecuta e proyecto y a cumpra e material. Den e siguiente periodo, e trabou di e restauracion lo continua y despues lo digitalisa e documentonan.
Exposicion
E otro aspecto di e proyecto aki, esta e parti di conscientisacion di e balor di archivo lo ta den forma di un exposicion, pa asina mustra e publico e documentacion restora y conta un tiki di e historia di e Kerki Protestant di Oranjestad. E exposicion ta wordo financia pa Fundacion ADA y lo wordo realisa conhuntamente cu e Kerki Protestant di Oranjestad y Archivo Nacional Aruba.
