Resumen di Evaluacion Impacto Ambiental di Baby Beach Resorts

ORANJESTAD – Bon Dia Aruba a ricibi recientemente un draft di un rapport encuanto e impacto ambiental di un proyecto grandi hotelero (900 camber) na Sero Colorado, riba e halto panort di Baby Beach. Suponiendo cu e rapport aki ta algo real, nos ta duna aki un resumen di e contenido. Separadamente den e edicion aki un impresion di e opinionnan cu nos a reuni tocante e proyecto y nos propio evaluacion di tur esaki.

E proyecto ta iniciativa di e compania local Three Rivers Real Estate NV, operando bao di e nomber “Centerpoint Real Estate” estableci na juni 2004. Unico director actual ta Intima Management NV. Directornan Milena Solognier, Marianela Solognier y Yolanda Clemencia Rojas. Ehecutor di e “Environmental Impact Assessment” (EIA; MER na Hulandes) ta Sustainable Solutions Consulting NV, estableci y lanta na Aruba na 1997. Director actual Rene Leonora.

Resumen di e rapport:
Ta trata di e plan pa construccion di un hotel di 900 camber bao di e nomber Baby Beach Resorts na Sero Colorado, riba e ‘plateau’ di calichi panort di Baby Beach, net pariba di e actual compleho di vivienda. E resort lo conoce dos fase, un prome di 600 camber di hotel ‘all-inclusive’ y dos aña despues di dos fase di 300 camber ‘European Plan’ cu ta un hotel no-inclusive). Banda di e cambernan e hotel lo tin un casino, spa, un sport club, piscina, restaurant, etc. E proyecto lo manda awa usa pa e planta di purificacion o un planta propio di purificacion. Awa purifica por bay pa p.e. e golf course den vecindario, segun e rapport. Tambe e proyecto lo bay haci uso di panel solar pa genera parti di su energia, e rapport ta menciona.

E tereno cu e proyecto lo ocupa ta di 105.000 m2, segun e rapport cubri actualmente mayoritariamente pa vegetacion abao. E proyecto lo ta situa na entre 100 pa 300 metro di Baby Beach, unda segun e rapport ta bisa, “We have been informed that occasionally turtles nest on the beach.”

E lugar di construccion ta keda cerca di e cueba y tunnelnan di e antiguo sitio di cobamento di fosfaat y ta señala cu parti di e tunnel lo keda bao di e espacio cu e hotel lo usa, incluyendo e entrada tapa di e tunnel. E rapport no ta señala ningun problema cu esaki, tampoco pa e awanan subteraneo den e area. Tampoco ta anticipa hopi efecto di uso di fertilizante y otro kimico, ya cu e landscaping lo ta ‘estilo desierto’ y no ta rekeri hopi di e tipo di insumo aki.

Pa loke ta e efecto di e hotel riba e awa den subsuelo y di lama, e rapport ta conclui cu, como cu e hotel ta leu di playa, y como cu e hotel no ta bay tin facilidad adicional riba e beach, no lo tin impacto riba e calidad di awa di lama. Igualmente e rapport ta optimista encuanto e impacto di bishitante riba e playa, e asina yama ‘beach erosion’. Aki tambe ta bisa cu e distancia entre hotel y playa ta garantisa cu no tin erosion.

NB: no ta trata e impacto di posiblemente mas di mil turista riba e beach, cu e efecto di tanto kimico den forma di sunblock, etc. Ademas di e tamaño reduci di e lugar, cu awor caba riba un diadomingo ta yen di ciudadano, cu ta mira esaki como nan ‘ultimo refugio.’

Esteticamente lo no tin problema, segun e rapport, pasobra ta arkitecto renombra ta encarga cu e diseño. Pa loke ta e contaminacion di awa, suelo y aire, e rapport ta bisa cu e distancia di lama, e profundidad di e capa (casi impermeable) riba cual tin awa subteraneo, cualkier impacto riba awa di lama ta altamente improbable.

Contaminacion di suelo lo ta improbable, considerando e actividad no industrial y e geologia, di baranca, ta ser anticipa altamente improbable.

Contaminacion di aire ta limita ya cu e mayor emision, despues di construccion, lo ta di cushina di e restaurantnan riba gas LPG, cu por lo tanto lo ta minimo, segun e rapport.

Impacto ecologico, segun e rapport, lo ta minimo ya cu e esazo animalnan den e area manera lagadishi y yuana lo move pa e areanan aledaño cu ta brinda un habitat similar. Ademas, e proyecto lo tin un landscape cu ta brinda bon posibilidad pa mas animal, manera pahra, lagadishi y yuana. Di e manera aki e proyecto lo tin un efecto positivo ecologico.

Pa loke ta e efecto riba e ambiente marino, no ta planifica mas facilidad riba beach, y lo o informa huespednan di proteccion di medio ambiente, incluso e presencia di tortuga ora nan tin neishi.

E sitio di e proyecto ta den un zona destina pa gobierno di Aruba como zona turistico. E rapport no ta menciona si ta referi na e ROP actual o e nobo cu no ta aproba ainda.

Conclusion di e rapport pa loke ta e efectonan ambiental ta cu lo no tin influencia riba e medio ambiente o ecologia.

 

You May Also Like

60 cliente cu limitacion mental temporalmente sin guia

  Pasadia Briyo di Solo ta haci apelacion pa yudansa Siman pasa tabata tin ...

piedra plat caso .jpg

Dama Chines ta bisa a hinca Fingal mata pa defende su mes

Despues cu polis a caba cu e integoracion di e dama Chines den e ...

Caya Betico Croes cu ambiente di fin di aña

Den cuadro di fin di aña, e comision cu ta plania Ambient’i fin di ...

Citgo su berdad a cuminsa sali

Citgo su berdad a cuminsa sali. Loke tabata anticipa pa basta tempo caba, pero ...

‘Dreamers’ ta haya permiso pero procedura pa nacionalidad no a wordo aclara

E proyecto Dreamers of Kast Kinderen cual tabata un colaboracion entre Departamento di Integracion, ...