Parlamentario Richard Arends(AVP): ‘Gobierno mester matene parlamento informa riba Venezuela’

ORANJESTAD – Fraccion di AVP a solicita un reunion cu gobierno relaciona cu desaroyonan cu tin na Venezuela y sobretodo e efectonan economico, humnitario y militar cu esakinan por tin pa Aruba. “Nos a tuma nota di hopi incertidumbre y nerviosismo den comunidad y esaki ta meramente pa falta di informacion continuo di partido di Gobierno,” asina e parlamentario a declara.

E reunion aki cu a tuma luga diaranson atardi, parlamentario Richard Arends a mustra cu lamentablemente gobierno no tabatin contesta of informacion riba preguntanan specifico cu fraccion di a haci riba e asunto aki.

Den su disertacion, parlamentario Richard Arends no a keda sin mustra su indignacion pa e posicion ambivalente di Reino unda cu ta reconoce un Presidente interino, pero na mes momento ta mantene relacion cu e Presidente cu realmente tin e poder ehecutivo na nos pais bisiña.

“E posicion ambivalente no ta yuda bo na mucho ora cu bo ta bisiña di e pais en cuestion y cu ta mantene hopi laso historico, familiar y economico,” e l a splica. E parlamentario a recorda tambe e episodio bergonsoso cu Aruba a pasa aden algun aña atras cu e persona cu a wordo apunta como consul general di Venezuela na Aruba y tabata wordo busca pa husticia Mericano.

“Pa loke ta trata e situacion actual, gobierno no a bisa nada nobo di loke cu a wordo bisa den prensa caba. Preguntanan manera nos capacidad infrastructural, humano y financiero pa ricibi posibel refugiadonan y na unda no a ser contesta.

Contrario na noticianan cu ta sali, gobierno a sigura cu Aruba no ta parti di ningun operacion humanitario ni militar. Tampoco ta considera un atake militar riba Aruba como un scenario cu mester prepara pe.

Pa loke ta trata e plan specifico pa maneha un fluho grandi di persona – cu ta e efecto mas eminente – gobierno no por a duna ningun informacion y e referi Ministerio di Asuntonan Exterior di Hulanda.”

Nos a urgi gobierno pa informa parlamento mas regularmente y sali afo y informa continuamente manera cu mester ta. Na momento cu bo no duna informacion, ta laga espacio pa speculacion y esey a sosode e fin di siman aki.

Ta un situacion sumamente delicado unda cu Aruba su nomber ta wordo menciona regularmente, gobierno tin e deber di sali afo y duna informacion y warda te ora cu parlamento yama gobierno ya cu esey ta ocasiona tur nerviosismo cu ta biba den nos comunidad.

Nos ta spera cu esaki ta prome di varios reunion, pa mantene e comunicacion cu parlamento y duna informacion pa loke ta trata e parti humanitario, pero tambe na momento cu Aruba mester duna asistencia pa e parti di ayudo humanitario, asilo politico y tambe di fluho di capital.

No solamente di hende nos ta papia aki pero di fluho di capital pa asina nos por tin un control riba esaki y parlamento wordo informa debidamente, “ parlamentario Richard Arends a declara.

 

You May Also Like

Fraccion di AVP ta condena medida anti democratico contra periodista Andrade

Lider di e fraccion di AVP den Parlamento Marlon Sneek a mustra enfaticamente  cu ...

POR: ‘Maneho actual di medio ambiente no ta sostenibel’

Cambionan den infrastructura ta inherente na desaroyo di un pais. Desaroyo di un pais ...

30Aug,JO, Abuso di mucha_Desiree.jpg

Proyecto Dreamers un proyecto sumamente bunita y necesario

Introduccion di e proyecto Dreamers algun siman pasa, ta den mi opinion un di ...

‘MEP kier haci fiesta atrobe cu Lotto pa Deporte’

Den e dianan aki Lotto pa deporte ta hopi den bocanan di parlamentarionan di ...

ReD: E berdad ta den e hechonan di nosgobiernonan

Un relato a wordotresina mi atencion awe; Kinderombudsvrouw: kinderrechtenslechtnageleefd op Bonaire, Sint-Eustatius, Saba.Ora mi a ...