Asombro general pa e medida cu gobierno a tuma encuanto varios empresa estatal y na Aruba Tourism Authority, notificando esunnan envolvi via un carta firma pa e actual ministro responsabel. Den e casonan referi e ministro ta anuncia na e personanan en cuestion, cu a tuma luga un asamblea extra ordinario di accionista, unda a tuma e decision pa e retiro concerni. Ni mas, ni menos. Of no, e ministro tabatin e cortesia di gradici pa servicio presta. Den e contexto negativo aki, sikiera un gesto pa aprecia, of no?

Pero den e asunto aki no ta importante si e ministro ta camufla su berdadero intencion cu cierto cortesia. Na prome luga ta surgi e pregunta: un ministro (gobierno) por actua asina? E contesta, manera tanto biaha, ta complica: si, y no. Ban tuma prome e casonan cu ta concerni comisario di NV estatal. Den tur caso di un compania anonimo, e asamblea general di accionista ta e organo soberano den e persona huridico aki. Director y comisario ta ser nombra, suspendi y retira pa decision di e reunion ey. Den e caso aki, unda ta trata di un solo accionista, Pais Aruba, ta posibel pa yama un reunion di accionista riba termino masha cortico, pasobra por laga tur formalidad di convoca asamblea un banda. Mayoria di estatuto di compania tin esaki stipula asina. Pues gobierno por yega masha rapido mes na un asamblea convoca validamente, pa por tuma tal decision. So far, so good, lo por bisa?

Pero no, tin algun otro aspecto di considera. Pa di prome, esun cu mester notifica di e retiro, no ta e ministro. Ni den su calidad di ministro, ni den su calidad di representante di e accionista unico, no ta na su persona pa notifica e comisario di su retiro. Esey ta na e ‘bestuur’, es decir na e director o colectivamente e directornan, pa manda e carta di retiro pa e comisario notificando cu den tal reunion a tuma tal decision. E pregunta ta pakico e ministro ta haci esaki, si su carta no tin validez legal. Probablemente e sa kico ley ta prescribi, pero e no por laga e ocasion bay perdi pa mustra cu ta e tin e poder final pa retira e persona, cu of sin formalidad cumpli corectamente. En todo caso cu e papelito cu e ministro a laga parti, nan no por yega na Camara di Comercio pa registra e retironan.

Pa esey mester e documentonan al caso di e asamblea teni. Y por supuesto e personanan concerni no mester di considera nan mes retira desde cu nan a haya e carta, pero por warda trankilamente te dia cu e directornan haci nan trabao segun ley. Awor e caso di retiro di miembro di e Hunta di Supervision di un entidad manera ATA, cu no ta un NV, y cu por lo tanto no tin accionista. Di cierto manera e entidad ta subordina na gobierno, pasobra e miembronan di e Hunta ta keda nombra via un landsbesluit, despues di proposicion (voordracht) di e entidad cu segun e ley mester haci esaki. Den tres caso ta trata di persona proponi pa AHATA. Manera mas tanto den legislacion, ‘esun cu ta pone, ta kita.” Den e caso aki lo mester traha un decreto (landsbesluit) pa efectua e decision tuma. No ta asina cu desde cu e persona a ricibi e carta di e ministro e mester considera su mes retira.

Masha bunita, tur e formalidadnan aki, pero tin algo mas cu lo ta molestia hopi hende. Si den pasado a haci un bon trabao pa eligi comisario pa un entidad, ta di supone cu a scoge hende iresponsabel, cu e conocemento y experiencia pa eherce e trabao di supervisa e trabao di e directornan, cu tin e responsabilidad pa e operacion diario. No ta pornada mayoria di estatuto ta duna e comisarionan e poder pa drenta den e empresa sin aviso previo, bay unda cu ta y exigi tur documento cu nan ta kere necesario pa haci nan trabao. Por cierto un responsabilidad hopi grandi. Lo ta un poco straño anto, si den empresanan estatal, cu e responsabilidad mas grandi ainda, ta posibel cu di nochi pa mainta un ministro por ordena retira cierto comisario, sin mas. Ta p’esey den hopi estatuto, no tur, tin reglanan adicional pa cu retiro di director y comisario. Por ehemplo, cu e retiro no por tuma luga legitimamente, si no a duna e persona en cuestion un oportunidad den e asamblea pa defende su maneho o actuacion.

Nos na e momento aki no ta na altura di e detayenan aki di cada entidad concerni, pero esey no ta cambia e asunto. Lo ta straño si den e reglanan di e entidadnan estatal aki, no a corda riba regla cu ta cuadra cu bon gobernacion en general. Lo no ta normal cu mester tin regla pa proteccion di profesional serio contra e ‘beis di dia’ di e ministro cu ta den poder na e momento ey? Ta parce cu en todo caso aki e cosnan no ta bon regla, atrobe, o ainda no… Te ki dia, Aruba?