E actriz Alexis Bledel tabata lief y gusta buki den ‘Gilmore Girls’ y ‘Sisterhood of the Traveling Pants’. Pero e actriz mes awo a bira oficialmente peligroso.
Compania di siguridad cibernetico McAfee dialuna a corona Bledel como e celebridad mas peligroso riba internet na 2019. Ningun otro celebridad tabata mas probabel di hiba usuarionan na website cu ta contene virus of malware.
Tras di Bledel na #2 ta anfitiron di talk show, James Corden, sigui pa strea di ‘Game of Thrones’, Sophie Turner, e actriz Anna Kendrick, strea di pelicula Lupita Nyong’o, strea di talk show Jimmy Fallon, maestro di arte marcial Jackie Chan, raperonan Lil Wayne y Nicky Minaj, y por ultimo actriz di Marvel, Tessa Thompson na #10.
E survey tin como meta pa resalta e peliger di click riba link sospechoso. Personanan cu mal intencion lo mara malware y link malicioso na nombernan famoso, cu speransa cu e fanaticonan buscando video riba internet lo bira un victima. McAfee ta urgi usuarionan di internet pa considera e riesgonan asocia cu busca pa contenido pirata y pa semper uza siguridad actualisa.
Gary Davis, hefe di evangelista di siguridad di consumidor na McAfee, a splica cu bledel y Turner probablemente a sali riba e lista e aña aki relaciona cu nan rolnan respectivo den e serienan popular ‘The Handmaid’s Tale’ riba Hulu y ‘Game of Thrones’ riba HBO.
