Ayera, rey Willem-Alexander a publica un mensahe riba video bisando cu e tin ‘arepentimento den mi curason’ y cu e no mester a bula bay Grecia pa un vakantie familiar siman pasa, un trip cu rapidamente a explota den indignacion publico na Hulanda, unda ta urgi pa hende keda cas lo mas posibel pa combati coronavirus.
“Ta haci mi dolor cu mi a daña boso confiansa den nos”, un rey sobrio a bisa den e video, cual ta mustr’e sinta banda di su esposa, reina Maxima, na nan palacio den un boske na Den Haag.
Ta altamente inusual pa un monarca Hulandes duna un mensahe asina arepenti na e nacion. E vakantie tambe a causa daño politico pa prome minister Mark Rutte, kende bao constitucion Hulandes ta responsabel pa e accionnan di e rey.
Willem-Alexander y su famia a bula bay Grecia, unda nan tin un cas di vakantie, diabierna ultimo, pero e rey, reina y un di nan yiunan a bolbe Hulanda diasabra anochi. E otro dos yiu muhe a bula cas despues.
E vakantie a yega apenas dianan despues cu gobierno Hulandes a introduci loke a yama un ‘lockdown parcial’ den un intento pa controla e aumento drastico di infeccion di coronavirus na e pais. “Maske e trip tabata dentro di regulacion, a falta sabiduria pa no tene consideracion cu e impacto di e restriccionnan nobo riba nos sociedad”, e rey a bisa. “Nos propio decision pa bolbe a ser tuma den e realisacion cu nos no mester a bay.”
“Nos lo sigui traha cu boso pa trece e coronavirus bao control. Pa asina tur hende den nos pais por resumi bida normal lo mas pronto posibel”, Willem-Alexander a bisa. “Esey ta lo mas importante aworaki y nos lo sigui haci esaki, lo miho posibel. Nos ta involucra. Pero no ta infalibel.”
