Siman pasa, Richard Griffin, consehero financiero y CEO di Rickstar Financial, a duna algun seminario pa comunidad local por siña tocante inversion, bolsa di balor, y diferente maneranan pa crea rikesa na Aruba.

Agente di real estate, Vicky Wesseling di Vickstar Realty a organisa e seminarionan gratis, cual tabatin como meta pa empodera e comunidad local cu e conocemento necesario pa nan no keda afo di oportunidadnan den mercado financiero.

Richard Griffin ta presidente y CEO di Rickstar Financial, un compania di planeamento di rikesa y inversion den bolsa di balor basa na Michigan, Merca. Rickstar Financial LLC tin un variedad di cliente, variando desde inversionistanan novato te cu atletanan profesional. E idea tras di e seminarionan tabata pa siña e comunidad local con pa haya un alternativa pa spaar den banco y real estate como e unico forma pa legal- y exitosamente laga nan placa crece.

“Desde Covid, Richard ta bin ta papia di cuminsa un sucursal di Rickstar Financial na Aruba”, Wesseling a bisa Bon Dia Aruba. “Pasobra ami ta bin di banda di real estate, tambe e por a mira e storia di con dificil cos ta pa comunidad local. Na e momento aki, ora bon tin un bon trabao cu bon entrada, toch bo no por haya un hypotheek. Of e hypotheek ta super abao, y cu e tiki placa ey, cu e mercado asina halto, bo djis no por cumpra un cas. Unda esnan cuminsando mester bay?” el a splica.

Wesseling ta bisa cu cosnan na Aruba no ta manera antes, tempo cu hende por a biba cu nan mayornan pa spaar placa, djey haya un tereno di gobierno, y poco poco construi nan cas. “Pa ora bo caba, finalmente bo ta bisa mami y papi ayo, y bay biba den bo propio cas. Esey no ta sucediendo mas”, el a bisa. Pa cuminsa, tereno ta birando scars. “Y prijs a bira asina halto, e mercado ta hacie imposible pa localnan por cumpra.”

Esaki, combina cu e golpi fuerte di pandemia di Covid, a laga Wesseling y Griffin ripara cu Arubianonan mester di otro manera pa crea rikesa personal pa individuonan. Wesseling ta bisa cu Griffin a cuminsa investiga e motibonan pakico no tin otro conseheronan financiero cu por manage cuentanan pa localnan por inverti den bolsa di balor – e “stock market” – for di Aruba mes. Y aki nan a ripara cu gran parti di e comunidad local no tin suficiente informacion pa sa con pa crea y maneha nan rikesa. “Bo no sa loke bo no sa”, el a bisa. E falta di acceso na e bolsa di balor ta nifica cu Arubianonan mester haya otro manera pa por anda cu inflacion y salarionan abao despues di Covid. “Mi tin amigonan cu ta maestro ainda no ta cobrando nan salario completo”, Wesseling ta bisa. “Nan mester busca un di dos trabao pa complementa nan entrada.” Esaki tambe ta pone presion riba plannan di retiro pa Arubianonan, lagando nan cu tiki opcion. “Prome cos bo mester haci ta inverti den real estate, pero pa esey bo mester cash of un hypotheek.”

Di su banda, Griffin a conta Bon Dia Aruba cu el a yega Aruba prome como patrocinador di Soul Beach Music Festival. “Esey tabata seis aña pasa, y mi a namora. Mi a namora di un muhe Arubiano, nos a cumpra un cas, nos tin un famia y mi t’aki awo”, el a bisa. “Pues mi ta stima e isla aki, mi ta parti di e comunidad. Hasta mi a corta mi cabey estilo Arubiano!”

Bon Dia Aruba a puntra Griffin na ki momento y con el a ripara cu na Aruba tin necesidad pa sorto di educacion financiero aki. “Hende a cuminsa puntra kico mi ta haci. Nan a haya sa kico mi ta haci.”
El a conta cu e ta trece su clientenan famoso na Aruba pa un trip dibertido, y door di esaki, hendenan local a ripara cu e ta yuda nan cu conseho di inversion, y tabata pidie si e por haci esey pa nan. Asina a bin e idea pa habri un oficina na Aruba mes.

“Nos a habri un oficina antes caba. Nos tin diferente regla y obstaculo pa surpasa, pero en general, ta mescos”, Griffin a bisa. “Bo mester haci drechi, cumpli cu reglanan, y esnan na poder mester compronde kico y pakico.”

El a bisa cu el a dicidi pa haci e seminarionan pa cuminsa yuda hende haya sa con pa crea nan propio rikesa door di inverti den bolsa di balor. “Esey ta e motibo pakico nos ta hacie. Nos no ta cobra, e seminarionan ta gratis, nos ta paga pa e sitio, nos ta paga pa e cuminda. Nos ta haci esaki pa siña hende lo basico di inversion. Prome cu nan cuminsa inverti, nos kier siña nan, nos kier nan bira consciente di kico tin eyfo.”
El a agrega: “Mi ta kere esey ta e manera corecto pa hacie, en bes di habri un oficina, laga hende bin, y haci eror cu nan placa.”

Griffin a splica cu Banco Central di Aruba no tin regulacion y permiso na lugar pa Arubianonan por inverti den bolsa di balor Mericano. E motibo cu el a dicidi pa habri un sucursal di su compania Mericano, na lugar di lanta un compania local, el a bisa cu ta cu mercado Mericano tin regla y regulacionnan mas estricto, y pues ta mas controla y mas safe.
Actualmente e ta trahando cu Banco Central di Aruba pa habri porta pa comunidad local por inverti den bolsa di balor.

Pa proximo aña, Griffin ta planeando mas seminario pa publico general. E idea ta pa empodera hende cu conocemento, pa nan cuminsa planea pa tuma control di nan rikesa.

 

LEAVE A REPLY

Please enter your comment!
Please enter your name here