(NLTimes) – Instituto di salubridad publico di Hulanda, RIVM, ta spera cu e coronavirus ta bay continua circulando na Hulanda. “Como resultado, nos ta spera cu tur persona cu no ta vacuna tardi o trempan ta bay haya e virus y bira malo”, segun director di RIVM, Jaap van Dissel a bisa den un sesion informativo den Parlamento riba e situacion rond di e pandemia, NOS ta reporta.

Cifranan di RIVM ta mustra cu 1.8 miyon residente di Hulanda no kier tuma e vacuna. Y e vacunanan no ta traha bon pa alrededor di 700mil persona, por ehemplo pasobra nan tin un sistema immuun zwak. “E ora bo ta bin na un grupo di 2.5 miyon persona cu no ta protegi contra Covid-19”, Van Dissel a bisa.

Esey eventualmente ta bay traduci na entre 16mil pa 22mil admision den hospital relaciona cu coronavirus, y entre 2,200 pa 3,400 admision den Unidad di Cuido Intensivo. Van Dissel no por a bisa durante ki periodo di tempo esaki lo sucede. “Por ta dentro di un luna of durante un periodo di dos aña, e calculacion pa esey ainda ta hopi compleho.”

Segun Van Dissel, e circulacion di coronavirus na Hulanda ta parce di ta stabilisando y ‘esey ta un preocupacion’. Alrededor di 75 porciento di adulto na e pais actualmente ta completamente vacuna, pero e distribucion regional di esaki tambe ta importante, el a bisa. “De lo contrario semper ta bay tin ‘pockets’ di persona cu cobertura di vacunacion abao unda e virus por continua circulando.”

E cifranan mas recien di RIVM tambe ta mustra cu e vacunanan di Covid-19 ta traha hopi bon pa protege contra hospitalisacion. Por ehemplo, e vacuna Pfizer cu ta esun cu ta usa na Aruba, ta 96 porciento efectivo den e sentido aki despues di dos dosis. Esaki tambe ta refleha den admision den hospital. Di e pashentnan hospitalisa cu coronavirus, 74 porciento no ta vacuna of ta parcialmente vacuna.

 

LEAVE A REPLY

Please enter your comment!
Please enter your name here