Hulanda cu tur ora ta enfatisa ‘Behoorlijk Bestuur”, ta actua totalmente contra principio di bon gobernacion. “E ta inaceptabel y nos no por bay di acuerdo cu Hulanda ta impone un cambio di structura estatal, a cambio di un ayudo di crisis,” lider di fraccion di MEP Rocco Tjon a bisa na Bon Dia Aruba ayera.

E reaccion aki a bin despues di reunionnan interno di MEP y tambe contactonan cu a haci cu Corsou y St. Maarten, cu tambe ta pendiente di ayudo di crisis for di Hulanda. Un ayudo cu no ta un regalo, sino un prestamo na interes di cero porciento.

Tjon a bisa cu te ainda no ta cla kico exactamente e ultimo condicion presenta pa Secretario di Estado Raymond Knops ta, mirando cu te ainda Hulanda no a manda esaki por escrito manera gobierno di Aruba a puntra. E intencion tabata pa diabierna awor, Conseho di Minister di Reino tuma e decision pa duna Aruba un fianza pa cubri su gastonan coriente pa luna di juli te cu september. Y tur cos tabata mustra cu Aruba lo por a conta cu e placa, ya cu “nos a cumpli cu tur e condicionnan cu Hulanda a mara na e prome fianzanan.” Ta trata aki di e 43 miyon florin cu Hulanda a manda despues cu e pandemia a para economia di Aruba.

Pero, pa malusa un crisis, unda a pone Aruba den un situacion imposibel, ta un actitud inhumano di Hulanda,” Tjon a sigui bisa.

Y tanten cu no lesa kico exactamente ta e proposicion nobo di Hulanda, no por spera di Aruba pa tuma un posicion. “No por sin mas hisa benta algo asina impactante na ultimo momento y haya un acuerdo di Aruba.”

Tjon ta argumenta cu Hulanda no por bin cu medida generico pa tur e tres paisnan den Reino cu ta confronta un crisis sin precedencia. “For di 2018 Aruba ta cumpli cu normanan financiero, di personal. Covid-19 a stroba implementacion di e reforma fiscal. Awor aki ta iresponsabel pa pusha Aruba den e reformanan aki. Sinembargo nos a cumpli cu tur otro exigencia, incluso reduccion di salario y condicionnan di AZV. Ta e otro islanan no a cumpli. No por bin cu exigencia irealistico y unilateral, cu ta afecta nos sistema constitucional.”

Mas ainda, Tjon ta mustra cu contrario na locual tabata e intencion ora cu a introduci e Supervision Financiero pa Corsou y St. Maarten, nunca a bin un evaluacion di con e institucion aki a funcciona. Manera su colega di partido Ady Thijsen a bisa, CFT despues di 10 aña no a yuda economianan di paisnan Corsou y St. Maarten.

Aruba mester aproba

No ta asina cu Hulanda por dicidi sin mas cu e RFT ta conta pa Aruba, segun Tjon. E ta mustra cu ta trata di un asina yama Consensus Rijkswet cu ta rekeri aprobacion di Parlamento di Aruba. “Problema ta cu unavez cu drenta e regimen, no por sali. Hulanda mester bay di acuerdo. Segun e rijkswet, Corsow y St. Maarten, unavez cu nan cumpli cu tur exigencia, lo por sali for di e supervision, si un comision apunta considera esaki. Pero e ta un conseho unicamente. Conseho di Minister di Reino por desvia di e conseho aki, mescos cu ta e caso cu e asina yama ‘geschillenregeling.’ Ta Gobierno di Reino semper tin e ultimo palabra.”

LAFT

Rocco Tjon a bisa cu berdad mester a bin adaptacion den e ley di supervision financiero di Aruba, LAFT. E ley di 2015 no tabata cuadra cu Statuut di Aruba. “Tanto Dr. Ryçond do Nascimento, como Raad van Advies a mustra cu LAFT 2015 tabata contra nos Constitucion, y a argumenta cu no por duna autoridad di Pais Aruba na otro instancia. “ A trece amienda den e ley. Sinembargo Gobierno no a ratifica LAFT 2018, pa motibo cu Hulanda a manda mensahe di desapobracion. “Hulanda a menasa y nos di Parlamento a compronde e posicion di Gobierno. Pero nunca a papia di introduci e Rijkswet.”

Pero di otro banda, Aruba a cera un protocol cu Hulanda y a traha segun e protocol ey. “E ultimo rapport di CAFT y tambe di Banco Central di Aruba tabata mustra claramente cu Aruba lo a cumpli cu e proyeccionnan acorda cu Hulanda. Nos a logra hasta surplus. “Pues, den forma bruto bisa, Hulanda ta practica pirateria moderno. Kier tuma un pais den su gara, sin usa violencia.”

Prestamo internacional

Pa MEP en todo caso, ta inaceptabel e supervision financiero di Reino. E opcion ta e ora cu nos mester bay fia riba mercado internacional. E lo no ta na 0 porciento y berdad Hulanda mester aproba. “Pero mi no por imagina mi cu Hulanda lo no duna su aprobacion. Pasobra segun Statuut, Hulanda tin un obligacion pa yuda nos. E prestamo ademas ta pa gastonan coriente, manera salario, ayudo di cuminda y otro. Pa esaki no mester bin ningun entidad special pa controla con ta usa e placa. Nos ta compronde cu ora di fia placa mester di condicion, pero no por bin cu condicion na ultimo momento cu no por cumpli cune.

Tripartite

Dialuna awor representantenan di Corsou y St. Maarten lo ta na Aruba pa hunto fiha un posicion comun den e impasse aki. Aunke cu no tur tres pais a cumpli cabalmente cu e condicionnan inicial di Hulanda, hecho ta cu nan ta di acuerdo cu e proceso pa duna e fianza ta bay contra e principionan di bon gobernacion. “Ademas e condicionnan ta inhumano.”

Tjon no kier anticipa kico ta e plannan den caso cu Hulanda keda cu su posicion, pero no ta exclui pa hunto acerca instancianan internacional manera Nacionnan Uni, Union Europeo y Parlatino.

Pero e ta crucial si cu Aruba ta uni. “Nos mester uni como pueblo, sin importa color politico. Sino e ta un causa perdi.”

Mientrastanto tur cos ta indica cu Hulanda a pospone e tratamento di e fianza pa dia 10 di juli. E decision aki por duna Aruba mas tempo pa negocia cu Hulanda, pero tambe lo por reduci e tempo necesario pa busca prestamo riba mercado internacional. E bentana ta cerando. Mester di fondonan pa dia 15 di juli.

Nota di redaccion:

For di e entrevista aki y esun cu Richard Arends den e edicion aki por sali e impresion cu ta trata di cambia un supervision financiero Arubano pa un di Reino. Esey categoricamente no ta asina; nos tin actualmente un supervision di Reino hinca den un ley local desde 2015. Hulanda ta exigi awor pa hinca e supervision di Reino den un ley di Reino.