Fiscal General Interino, Rod Rosenstein, a entrega su retiro ayera, cabando un termino di casi dos aña, defini pa su nombramento di un consehero special pa investiga conexion entre campaña di presidente Donald Trump y Rusia. Su ultimo dia lo ta 11 di mei.
Retiro di Rosenstein ta spera desde confirmacion di William Barr como fiscal general. Cas Blanco a nomina un reemplaso pa e puesto #2 di e departamento algun siman atras.
Rosenstein tabatin intencion di retira meymey di maart, pero a keda pa e terminacion di e investigacion di consehero special Robert Mueller tocante Rusia. Mueller luna pasa a entrega su reporte na Departamento di Husticia, y Rosenstein tabata parti di un grupo chikito di oficialnan di e departamento kende a revisa e documento y a yuda duna forma na su revelacion publico. Despues cu Mueller no a logra forma un conclusion si Trump a obstrui e investigacion, Barr y Rosenstein a determina cu no tin evidencia suficiente pa duna sosten na esey.
Rosenstein a nombra Mueller na mei 2017 despues di e retiro di e entonces fiscal general, Jeff Sessions, y a supervisa hopi di su trabou. Su salida ta laga e departamento sin e oficial mas cercanamente alinea cu e investigacion, mientras oficialnan ta lucha cu scrutinio publico y congresional di e hallazgo di e consehero special y e maneho di e reporte na man di e departamento.
No solo el a supervisa e trabou di Mueller pa mayor parti di e ultimo dos aña, sino tambe a defende e investigacion contra atakenan di Republicanonan den congreso y Trump, kende a tacha e investigacion di ta un ‘caceria di bruha’. Den haci esey, Rosenstein algun biaha a haya su mes den confrontacion cu Trump, pero sinembargo no a bira victima di e mesun rabia dirigi na Sessions, kende su retiro a yena e presidente di rabia, hibando na e retiro forsa di Sessions november ultimo.
E posicion di fiscal general ta un trabou altamente significante, responsabel di supervisa e operacionnan diario di Departamento di Husticia y e trabou di fiscalnan Mericano den henter e pais.
