10mei, JM, ATA (1).jpg

Durante e bishita di trabou di Minister di Turismo Otmar Oduber pa Cuba, pa entre otro un conferencia di turismo di Organisacion Mundial di Turismo, a firma tambe un acuerdo den forma di un  MOU cu Gobierno di Cuba cu lo beneficia Aruba en general.

Director di ATA, Aruba Tourism Authority, Ronella Tjin Asjoe-Croes a splica cu e MOU aki ta di gran importancia pa Aruba. “E ta un bentaha, pasobra e ta mustra con nos ta enfocando riba productonan nobo, un itinerario nobo, y un posibilidad pa esnan cu ta interesa den un crucero cu no solamente nan ta bishita luganan tradicional pero tambe participa den un combinacion di destinacionnan cu ta inclui Aruba, Panama, Colombia, Corsou, Boneiro y Cuba.” Esaki, e ehecutivo a splica, ta un bentaha pa Aruba pa uni su mes y cera aliansa cu un destinacion cu ta den demanda. Mester haci uzo di e fenomeno aki y saca beneficio pa Aruba y ofrece esnan cu ta interesa un itinerario nobo.

Pa ATA Cuba ta un topico pa varios aña, cu nan a bin ta siguiendo y ora cu a constata cu nan a cuminsa habri porta, ya Oficina di Turismo tabata sa cual ta e pasonan cu nan mester tuma. No mester mira Cuba como un competencia, pero mas bien como un aliado nobo, principalmente den mundo di turismo crucero, cual ta un punto di enfoke di e Gobierno di e pais aki. Nan ta interesa pa desaroya turismo crucero y kier yega na aliansanan cu otro paisnan pa haci combinacion di un itinerario nobo.

Durante e prome bishita oficial pa Cuba, e cooperacion entre e dos islanan aki tabata e punto cardinal di combersacionnan. Nan ta masha interesa den desaroyo turismo crucero mirando cu nan tin diferente waf, pues varios opcion, y ta mira Aruba como un socio pa yuda nan pa bira “homeport” tambe cu lo nifica beneficio pa e parti aereo. Mirando e presentacion di e proyeccion cu Cuba tin pa desaroyo di turismo pa 2030, nan ta concentra riba mas turismo crucero y e turistanan cu ta keda den hotelnan. Cuba a wordo acerca caba door di hopi companianan crucero, pa cual Cuba ta mira cu Aruba lo por yuda nan duna forma na un combinacion di destinacion.

Ronella Tjin Asjoe-Croes e ehecutivo di ATA tabata presente tambe den un reunion, unda cu e tema central tabata aspecto di Cultura. El a señala cu Cuba ta hopi fuerte riba tereno di Cultura, nan habilidad di restaura monumento, crea artista inherente na nan base di historia. Esaki ta algo cu Aruba y ATA por siña di dje, pasobra e bishitantenan ta busca mas autenticidad den e destinacionnan cu nan ta bishita. Aruba tin e talento y artistanan  y nan conocemento mester wordo pasa over pa e bishitantenan di Aruba. Cuba den esaki tin hopi experiencia, con pa cana y facilita organisacion di mas atraccionnan cultural, di loke tin caba.  “Cuba tin e infrastructura cu nos por siña di dje.”

LEAVE A REPLY

Please enter your comment!
Please enter your name here