Residentenan di Aruba, Corsou y Boneiro pega na Peru y Bolivia por registra via e email lim-rsvp@minbuza.nl pa mustra nan interes pa aborda un vuelo special cu embahada di Reino Hulandes na Peru, Ecuador y Bolivia ta organisando. No ta conoci cuanto persona di islanan ABC ta pega na Peru y Ecuador.

Peru ta un di e paisnan cu ta lidiando cu un crisis di COVID-19 mas pisa rond mundo. E pais Latino Americano ta e di 11 pais cu mas caso registra, siguiendo Turkia (8), India (9) y Iran (10). Na momento di publicacion tabatin 115,754 caso registra na Peru, di cual 3,373 a conduci na morto y 47,915 a recupera. Ecuador mientrastanto a registra 36,258 caso, di cual 3,096 a conduci na morto y 3,557 a recupera.

Un Rubiano di descendencia Peruano cu a tuma contacto cu Bon Dia a indica cu na Peru ta reinando un clima di miedo rond di e situacion di COVID-19. El a indica cu te aworaki tin mas o menos un grupo di 10 persona, pero tin chens cu tin mas cu no ta na altura di e iniciativa aki. Gobiernonan di Peru y Ecuador a tuma medidanan estricto, mescos mayoria pais cu a registra casonan. Embahada di Reino Hulandes ta pidi pa registra via e email lim-rsvp@minbuza.nl pa asina por regla vuelonan via ruta Lima- Quito – Aruba pa residentenan di islanan ABC. Si menos cu un cantidad di 25 persona registra, e vuelo lo costa 950 dollar Mericano. En caso cu tin mas persona, e prijs tin chens di baha.

Comments are closed.