(AP) — Rusia a bisa ayera cu Merca a rechasa visa na periodistanan cu tabata kier cubri e biahe di Minister di Exterior, Sergey Lavrov na New York, y Lavrov a sugeri cu Moscu lo tuma medidanan fuerte como represalia.
No tabatin comentario inmediato di Departamento di Estado Mericano tocante e acusacion di visanan rechasa. E periodistanan tabatin intencion di cubri e apariencia di Lavrov na Nacionnan Uni pa marca e presidencia di Rusia den Conseho di Seguridad.
“Un pais cu ta yama su mes esun di mas fuerte, mas sabi, liber y husto a cobardia y haci algo kens door di mustra kico su siguransa hura pa protege libertad di expresion y acceso na informacion en berdad ta bal,” Lavrov a bisa prome cu bandona Moscu ayera. “Keda sigur cu nos no ta bay lubida y nos no ta bay pordona,” el a bisa.
“Mi ta enfatisa cu nos ta bay haya manera pa responde na esaki, pa asina e Mericanonan corda pa hopi tempo pa no haci esaki,” vice-minister di Exterior, Sergei Ryabkov a bisa.
E disputa ta yega despues di tension halto cu Washington relaciona cu e aresto luna pasa di reportero di Wall Street Journal, Evan Gershkovich, kende Rusia ta acusa di spionahe. Merca a declar’e “detenido ilegalmente.”
Cantidad di periodista occidental staciona na Moscu a bandona e pais despues cu Rusia a manda trupa den Ucrania. Rusia actualmente ta rekeri pa periodistanan stranhero renoba nan visa y acreditacion cada tres luna, compara cu un biaha pa aña prome cu e bataya a cuminsa.
