(NLTimes)—Hulanda ta cla pa sigui asisti Turkia despues di e teremoto cu a pasa den e region e siman aki, Prome Minister Rutte a conta e President di Turkia Recep Tayyip Erdogan.

Mescos cu ayera, Rutte a duna su condolencia pa tur victima na Turkia y Siria. Te awo, e cantidad di morto causa pa e teremoto a aumenta pa mas cu 6.000. Na Turkia mes, 4.544 persona muri y casi 27 mil persona tabata herida. E cantidad di victima por subi mas ainda.

“E impacto ta casi incomprendibel,” Rutte a bisa riba Twitter. “E unico cu nos por haci awo ta spera cu nos lo haya mas informacion tocante e hendenan perdi den e area, incluyendo algun ciudadanonan Hulandes,” El a bisa.

E parti zuidoost di Turkia a experiencia un teremoto di un magnitud di 7.8 dialuna mainta. E epicentro tabata 26 kilometer noordwest for di e ciudad di Gaziantep, cerca cu e frontera di Siria. Un segunda teremoto casi mesun fuerte a sosode un rato despues, y ciudadanonan a sinti mas cu shen aftershock.

Awo 8 Hulandes ta perdi

Al menos 8 ciudadano Hulandes ta perdi den e area afecta, e Minister di Asunto Exterior a confirma diamars anochi. E cantidad prome tabata na 6.

Ainda no tin confirmacion di e autoridadnan Turco tocante morto of herida di ciudadano Hulandes. Tin preocupacion cu ainda tin basta hende bou di e secuela di e desaster.

“Ta dificil pa compronde e scala di e desaster,” Rutte a declara.

Campaña pa fondo nacional a wordo lansa

Mientras tanto, un esfuerso conhunto di varios organisacion Hulandes a lansa e campaña di Giro555 diamars pa colecta placa pa e victimanan na Turkia y Siria. “Mester di ayudo di emergencia urgentemente, pa un temporada cortico y largo. E organisacionnan di ayudo a reuni hunto y ta pidi full Hulanda tuma accion hunto pa e victimanan di e desaster humanitario aki,” Giro555 a bisa.

Cruz Cora di Hulanda a habri un cuenta dialuna pa colecta donacion pa e areanan afecta. Pa 2or di atardi, mas cu 2 miyon euro a wordo colecta den 24 ora, un vocero di e organisacion a bisa.

Giro555 ta organisando un dia nacional di accion pa e victimanan pa dia 15 di februari, pero e contenido di e evento no a wordo anuncia ainda. Un otro Giro555 tambe ta sigui colecta placa pa duna alivio pa e victimanan di e guera na Ucrania. Tur hende por haci donacion na e campaña ey tambe.

Rotterdam y Amsterdam ta dona 1 euro pa residente.

Amsterdam y Rotterdam lo haci un donacion di 1 euro pa cada habitante na Cruz Cora. “E teremoto na Turkia y Siria ta un desaster inespera. Nos ta simpatisa cu esnan afecta, y tur ciudadano Turco, Kurdo y Sirio Hulandes cu ta bibando den miedo y preocupacion,” E ciudadnan a tweet diamars.

 

Amsterdam a anuncia cu e lo haci un donacion di 905.000 euro. Rotterdam, cu mas di 664.00 habitante a haci un donacion di 650.000 euro, un vocero di municipal na Rotterdam a bisa. Den total, e donacion ta casi 1.5 miyon euro.

Segun e vocero di Rotterdam, ambos ciudad a realisa masha lihe cu algo mester wordo haci pa asisti e victimanan. “Tabata tin un consulta breve entre e alcaldenan y nan ta di acuerdo cu un decision mester wordo anuncia conhuntamente. Si otro ciudad no a participa, nos como Rotterdam lo a haci e donacion riba nos mes. Asina nos a haci tambe den pasado.”