Diamars dia 5 di maart, S.V. Unistars a enfrenta Altantico Deportivo na Centro Deportivo Frans Figaroa na Noord pa nan di tres wega den poulle A pa e Liga Honor Plata.
E ekipo di division uno di S.V. Unistars ta gana atlantico cu score di 8-0. Asina nan ta bay back na cas cu tres punto valioso. E ekipo ta invicto y cu 9 punto na prome luga den e etapa di poulle A.
E prome gol a cay 36 minuut despues cu wega a cuminsa, hinca pa Albert Francis “Killer” y asisti pa capital Rick Engelbrecht. Despues a sigui otro golnan entre otro for di Randolph Werlemen, asisti pa Jeandrick de Cuba, dos di Margin Kock, Camilo Sanchez y Danny Sint Jago. Tambe tabatin gran prestacion di keeper Jonathan Sanchez.
Spirito durante wega tabata halto y fanaticonan di e ekipo di Pos Chikito no a desapunta den nan apoyo, cual a ser acompaña hasta cu un presentacion chikito di brassband.
Despues di e victoria aki, S.V. Unistars ainda lo tin ocho wega mas pa yega e Division di Honor pa prome biaha den historia di e club. Dia 11 di maart binidero, e ekipo lo enfrenta C.D.R.A cuminsando 7or di anochi na CD Frans Figaroa.
Resto di e schedule di S.V. Unistars den Liga Honor Plata ta inclui un wega contra Bubali dia 25 di maart, 9or di anochi; contra United dia 7 di april, 8or di anochi; contra Caquetio dia 16 dia april, 8or di anochi y C.D.R.A atrobe dia 28 di april, 4or di atardi tur tumando luga na CD Frans Figaroa.
Potretnan cortesia di S.V. Unistars riba Facebook.
