E ta un psicologo for di 2008 na unda el a studia su Bachelor na Merca y a haci su Master den psicologia clinico na Hulanda, den caminda aki e tin varios aña dunando diferente tayer pero esaki ta esun prome y mas special cu ta trata di “Amor Propio.”

Sabrina Sonensein ta haya cu den su mes y den otro hende cu hopi biaha nan ta bezig ta haci cos pa hende “en bes di haci cos pa nos mes y cu esey por mustra y duna amor propio pa nos mes,” manera el a sigura.

Igualmente e ta afirma cu tin personanan cu tin compasion pa otro hendenan pero ora ta yega na nan mes, no tin tempo, no tin e placa, tin yen cos pa haci of ta mucho cansa, en bes di stima nan mes prome cu otro hende.

Pa hopi biaha hende ta kere cu amor propio ta trata di bay haci cabey, sali un rato y bebe algo of haci huña, “pero amor propio ta hopi mas cu esey: e ta aceptando nos mes cu nos partinan bon y cu nos partinan menos bon cu nos ta consciente cu mester drecha. E ta aceptacion absoluto di nos curpa, cu tur loke tin aden y cu nos ta stima nos mes, no solamente pa otronan, sino pa nos mes tambe,” el a comenta.

Sentimentonan cu tin balor propio cu no mester di otro hende pa bisa e balor cu hende tin, no mester validacion externo pa bisa kico e persona su balor ta, kico por haci y esey pa Sonensein no ta importante solamente pa hende adulto sino tambe pa hobennan y mucha: “si nos no cultiva amor propio for di chikito y siña nos muchanan, e dia di mañan nan tambe ta bay haya falta di amor propio y e ora ey e bullying ta bin, imagennan negativo di nos curpa ta bin, love self-steem ta bin. E ta hopi importante siña nan for di chikito cu nan ta bale hopi y no solamente bisa nan cu nan ta sabi of bo no ta sabi, pero si e caso tal cosnan tin biaha no ta bay bon cu pa enfrenta desafionan di un manera mas positivo y por crece cu trabou duro y perseverancia. Si nos no tin amor propio, nos ta basa nos mes y nos balor riba kico otro hendenan ta pensa.”

Ta p’esey el a haya cu esaki ta un bon manera pa haci un tayer pa no splica solamente kico ta amor propio sino tambe kico e ta nifica: “algun hende ta kere den selfish, cu ta narcisista y esey no ta asina, debi cu narcisismo ta nifica cu e persona no ta worry cu otro hende. E importancia di e balor propio ta cu si hende no sa kico nan tin pa nan mes, si no sa con ta stima nan mes, con ta bay siña otro hende stima nan?” Sonensein a señala.

El a trece dilanti tambe cierto pensamentonan eroneo cu hendenan tin for di chikito y for di generacionnan anterior cu no ta ni sikiera di nan mes, manera un ciclo generacional of un trauma generacional na unda Sonensein ta señala cu ta importante pa hendenan wak nan mes den spiel, acepta y reconoce na unda nan por traha mas, aprecia e persona cu porta door di traumanan den pasado of otro factornan, no kier ni wak nan mes den un spiel mirando e partinan negativo prome: “mester wak bo mes den spiel, wak bo esencia, no tin nada mas cu ta sana e mente y curpa cu ta wak bo mes den spiel y bisa I love you.”

Pa e motibo aki e kier siña mas hende cu ora ta bisa un afirmacion, tin cu kere den esey of e mester ta algo cu pa e persona mes ta hopi importante y asina e ta keda crece den esey pa sana, tambe debi cu tin hende cu algo por a pasa nan pa diferente motibo pero si no ta conscientisa cu tin cierto cosnan cu por mehora, nos no ta bay enfoca riba esey,” el a bisa.

E tayer aki ta bay tuma luga diasabra 27 di mei na Baz-Galeria for di 9.30am te cu 1pm, e costo ta 85 florin pa persona y esnan interesa por haya mas informacion riba e Facebook Page: Mindful Love Aruba y mediante e-mail: sjsonens@gmail.com

“Mi stima bo pero mi ta stima mi mes mas” ta e palabranan cu Sonensein ta enfoca riba dje pa asina hendenan cuminsa ripara cu amor propio ta existi y ta algo valioso cu cada persona tin internamente.

El a pone como por ehemplo cu na Aruba tin hopi hende cu por a pasa den diferente situacion y cu no ta stima nan mes, no tin compasion cu nan mes pero si por yuda otro hendenan, papia bunita cu otro hendenan pero nan mes no ta dispuesto pa papia cu nan mes manera e hende cu nan ta stima.

“Hopi biaha nos kier haci cos pa otro hendenan, como mama of como tata nos kier sacrifica hopi pa nos yiunan of nos famianan…how about nos focus mas riba nos mes? Asina nos por crece, asina nos por sigui cultiva e amor propio. Mi ta ripara cu ainda falta hopi, pasobra nos ta kere cu selfcare de bes en cuando ta amor propio y esey ta un factor so. Drumimento ta sumamente importante y scoge bo circulo di amigonan tambe ta amor propio. Awendia tin hende cu no ta autentico, no ta honesto cu otro hende pero tampoco cu nan mes y no tin nada mas dushi cu ta honesto pa nos mes, pa nos ta e miho version,” el a finalisa.