Cinco polis a ser deteni despues di hopi disturbio y sakeo produci durante e fin di siman aki na Venezuela, como consecuencia di protesta pa salida di circulacion di biyete di 100 bolivar. Mas di 300 hende a resulta deteni despues di hopi bringamento.
Ciudad Bolivar, ciudad sur di Venezuela, tabata e centro di protesta despues cu a conoce un anuncio di banda di gobierno di un toque di queda (prohibicion di circulacion den estado aki), como tambe traslado di militar y e decision di mantene e frontera cera te 2 di januari.
Francisco Rangel Gomez, gobernador di estado Bolivar a comunica cu un hende cu a muri y 262 persona a ser deteni na Bolivar so. Na ciudad Bolivar nan a dispone di 3200 militar pa purba di controla e situacion ey. E pagina di Correo del Caroni a reporta 5 morto pa motibo di sakeo, cu a tuma lugar entre diahuebs y diasabra.
Riba tur red social tabata presente e potret di polis ora cu nan tabata participa den sakeo y mobilisacion di mercancia cu no a ser reporta na nan superiornan.
Autoridad a splica cu e polis Ronald Medori y Yoglis Gámez a decomisa varios cuminda cu a ser sakea di un supermercado, y nan no a entrega esaki na central di polis. E dos polisnan a aparece riba potret cu un vehiculo priva. Ora cu autoridad a haya sa di e situacion aki, nan a ser deteni na central di polis.
Diadomingo cu a pasa polis a detene den operativo cinco hende cu tabata purba pa comete acto di vandalismo, y entre e personanan deteni tabatin un polis tambe.
