16-03-24_PDVSA.jpg

16-03-24_PDVSA.jpgE reciente sancionnan di Estadonan Uni contra e empresa petrolero estatal Venezolan Pdvsa a cuminsa afecta tambe su compania na Texas, Citgo Petroleum Corporation. Esaki ta dificulta e posibilidad di e refineria di obtene e creditonan cu nan mester pa cumpra crudo, di acuerdo cu varios fuente di operador y banconan, segun agencia Reuters.

Menos proveedor di petroleo ta dispuesto pa bende cargamento di crudo cu Citgo mediante prestamo habri, y na lugar di esaki nan ta exigi prepago o letra bancario pa suministra crudo na e red di refinacion, cu ta maneha tres refineria na Merca, cu capacidad pa procesa 749.000 bari pa dia.

Dos fuente di proveedor di crudo Canadiense a bisa cu nan companianan ya no ta haci negoshi directamente cu Citgo y cu nan a cuminsa bende cargaments via tercera parti, pa evita e riesgo crediticio. Di otro banda, noticia di algun tempo pasa a señala cu Citgo a bira mas dependiente di compra di crudo riba mercado Mericano, pa motibo di e restriccion cu PDVSA mes a impone den su suministro di crudo na su subsidiario, causa pa e aumento di fluho di entrega na e empresa estatal Ruso Rosneft, bao di e condicionnan di e prestamonan biyonario cu Venezuela a haya di e compania aki.

Ademas Venezuela tabatin retraso serio den e suministro di crudo na Rosneft bao di e acuerdonan menciona y tabata obliga di aumento entrega. Ministro di petroleo Nelson Martinez a declara na luna di mei ultimo, cu Rosneft lo a cuminsa haya 70.000 bari pa dia como pago pa un prestamo di US$ 1.5 biyon na PDVSA na 2016. Den ultimo aña Rosneft a pasa entre 4 y 5 biyon dollar pa e compania estatal y pa estado Venezolano, cu e compromiso di pago cu crudo.