Pa hopi tempo caba nos ta mira un situacion ta surgi cerca nos bisiñanan cu no ta priminti nada bon. Varios momento caba nos a pensa cu awor si, awor si, pero semper ta parce cu cos por bira pio, sin rementa, ainda. Situacion na Venezuela a bolbe yega na un punto asina. Mientras ta tumando luga un mediacion bao auspicio di clero catolico, entre gobierno ehecutivo y mayoria opositor den parlamento, tin tambe preparacion pa un marcha grandi planifica pa mañan, cu tin como meta pone un multitud grandi riba pia cu ta marcha pa palacio Miraflores.
E idea ta pa confronta e presidente cu un multitud pa purba convence cu berdad mayoria den e pais no kier mir’e den e puesto. E marcha lo a keda cancela na ultimo ora, fruto di e dialogo te awor.
Chavistanan arma tabata preparando caba pa kibra e demostracion aki y den pasado nos por a mira kico esaki ta: creando caos y disturbio, y confrontacion arma. Pasobra nan ta arma y ademas tin e poder arma uniforma nan tras. E miedo tabata anto cu, mescos cu algun aña atras, unda a pone Leopoldo Lopez responsabel pa e mortonan cu a cay na man di e turbonan socialista, bao supervision di e forsanan uniforma, cu esaki lo a haya un ripiticion. Y maske cuanto rabia esaki por lanta den pueblo, gobierno tin e capacidad militar na su disposicion pa para cualkier demostracion pacifico.
Di otro banda ta di comprende cu oposicion no por sinta man crusa y simplemente reclama nan derechonan legal, mientras cu tin un gobierno ehecutivo cu no ta respeta ni e constitucion cu nan mes a elabora, cu ta encera tambe e derecho riba e referendum pa revoca mandato di e presidente eligi. E poder ehecutivo a bay asina leu caba cu no tin ningun respet y no ta tene cuenta di ningun manera cu parlamento. A laga Tribunal Supremo Hudicial, e autoridad hudicial mayor corumpi, asumi tarea di parlamento, manera den e caso reciente di aprobacion di presupuesto 2017.
Claro cu esaki tin su limite; na Venezuela nan por maneha un presupuesto no aproba pa parlamento, pero ora ta trata negoshi cu entidadnan financiero internacional, otro gai lo canta.
Pero tur esaki no ta yuda ‘oposicion’, un palabra realmente straño ora nos ta papia di e movemento politico cu a logra haya dos tercera parti di e votonan den ultimo eleccion parlamentario. Pero den un sistema presidencial manera Venezuela conoce, esaki ta posibel, basta respeta otro, pero net esey no ta e caso y ta goberna e pais cu forsa bruto, finalmente contando cu e brasa arma. Y ta exactamente aki e problema ta sinta: no pa prome biaha, pero atrobe ta tumando luga un enrikeciendo enorme di e top di e aparato militar y policial, cu no solamente ta representa e poder fundamental arma, pero cu a participa na grandi den e fiesta di horta y bende, unda e obheto principal tabata e compania PDVSA, cu ta maneha e rikesa number un di e pais: e reservanan di petroleo y gas, riba cual e pais ta depende pa tur cos: pa crea divisa, pa paga pa importa cuminda y tur otro cos cu un tempo e pais mes tabata produci. Y pa grandi cu e rikesa ta, e no por yega nunca pa tur cos, si gradualmente tur otro produccion ta dal para.
E pregunta grandi ta: ki ora, ki dia, sano huicio lo cuminsa penetra den mente di esnan cu ta dirigi e caos aki? Cuanto tempo ainda nan ta kere cu nan por keda wanta e situacion aki, si un gran parti di pueblo no tin di come ni tin remedi pa cura nan problemanan medico? Nos por pensa cu e dialogo cu a cuminsa e siman aki ta un luz na final di e tunnel. Esey lo ta e caso cu un adversario politico cu basicamente ta acepta e idea di un democracia representativo, unda esun cu perde ta pasa pa otro banda di e sala, y e otro ta bay goberna.
Pero esey no ta asina, ainda. A traha un constitucion pa gaña wowo di otronan, mientras cu e poder berdadero ta basa riba e beneficionan cu e elite militar ta gosa. Si e regimen Chavista pasa pa pasado, y lo ta bon pa Venezuela si esey sucede, no ta e Chavistanan na civil so ta perde. Esnan cu ta perde na grandi ta e personanan cu ta representa e berdadero poder den e pais, aunke ta parce cu e Chavistanan den nan camisa cora ta representa e poder final. Nos tur ta corda di unda Chavez a bin? El a basa su exito den gara poder riba dos cos: e malcontento general contra e abusonan politico y economico cu e poblacion pober tabata sufri na man di e riconan.
Esey ta e apoyo cu no t’ey mas. E otro si e tin ainda, y nan futuro tambe ta den wega: e cuerponan uniforma. Ta di spera cu sano huicio lo prevalece y Venezuela haya un salida pacifico, dependiendo tambe di posicion di forsa arma.
