Avioneta (NW) (3).jpg

Den edicion di 25 di october Bon Dia a publica e noticia di e avioneta H1879 cu a bin for di Haiti y a crash land na Aruba. Aki tabata tin un investigacion, pa asina wak si ta trata di un acto castigabel.

 

Husticia no a haya ningun indicacion cu den e avioneta droga a wordo transporta. E avioneta a wordo investiga cuidadosamente riba esaki, segun Ministerio Publico (OM) den un relato pa prensa.

 

E piloto di e avioneta di dos motor Haitiano cu a aterisa riba dialuna 24 di october na aeropuerto Reina Beatrix, a wordo interoga debidamente pa Hues Comisario diabierna ultimo. E piloto a keda den detencion pa motibo cu e ta wordo sospecha di posesion di un certificado di piloto (vliegbrevet) falso. Ademas e ta wordo sospecha di a stroba servicionan di aeropuerto pa motibo cu el a aterisa na un manera peligroso. OM ta informa cu nan lo persigui e  piloto pa e echonan aki.

Nan a deporta e tres pasaheronan diabierna despues cu husticia a  interoga nan varios biaha y OM no tin ningun indicacion cu nan lo a haci nan mes culpabel di e hecho castigabel aki.

Aeropuerto a haya un susto cu e aterisahe di emergencia di un avioneta, cu diripiente a bula bin desde direccion oost y a baha riba e pista di aterisahe robes. E avioneta a cay di e pista y e tren di aterisahe a sak.

 

Vuelo di test

Investigacion ta mustra cu aki tabata trata di un vuelo di test desde Haiti. E piloto y e pasaheronan a declara cu nan tabata test e avion pa un posibel cumprado. Nan a declara ademas cu e piloto no tabata por a haya contacto cu toren na Aruba y cu pa e motibo ey e tabata bula hopi abao, segun OM.

 

 

LEAVE A REPLY

Please enter your comment!
Please enter your name here