Santa Rosa ta pidi pa hende tuma nota cu awa di molina of dam ta specificamente pa e cunukeronan. Mirando cu a haya keho cu ta mira hende ta haci uzo di awa di dam pa laba truck of otro material.

Nathalie Maduro, Director di Santa Rosa a comparti informacion tocante e maneho cu ta realisando. Den caso di dam, e ta bisa cu diariamente ta haci peticion pa comunidad no haci mal uzo di awa di dam of pos.

Nan ta ripara cu ta un tendencia cu hende ta pensa cu pa motibo cu tin hopi awa, ‘ban mal gasta e awa’. Sinembargo den caso specifico di e mal uzo di awa, nan a haya sa cu un compania cu ta laba bari di sushi ta busca awa di molina di Savaneta pa laba e barinan.

Maduro ta duna di conoce cu a purba di tuma contacto cu e persona encarga pa wak si tin cooperacion ‘pero lamentablemente e ley no ta den efecto pa locual ta proteccion di pos’. Santa Rosa tin cierto maneho cu a implementa y a pone riba borchi cu ta pidi cooperacion di persona cu ta haci uzo di tanki di awa.

Di parti di Santa Rosa a pone varios borchi, pero algun persona ta kibra nan y tira algun di nan den e mesun dam. “Asina mes nos lo sigui informa. E ta responsabilidad di Santa Rosa pa cuida e dam, nos pos.”

E ta asina leu cu e departamento ta pidiendo cooperacion di DIP pa e planeamento di ROPV pa tene cuenta cu conservacion di pos y dam. Pero tambe nan kier haci apelacion na comunidad di Aruba, truck septico, compania di construccion y compania cu ta traha caminda pa no haci mal uzo di awa di dam.

Tin algun dam cu a cera cu piedra, cual Maduro ta bisa cu esey a yuda pa monitor tur e diferente dam. Nan a constata cu en berdad sushi no ta benta eyden. No por haya acceso asina facil na nan y di e forma ey a laga espacio pa cunukeronan cu tin pick up y tanki por pasa asina cu tin piedra rond.

“Nos a haya un caso cu polis a duna un boet na cierto compania cu cunucu a cumpra un truck y bay busca nan mesun awa. Nos a compronde cu nan a hala piedra unda e dam tabata cera, pues e bisiña a wak y yama polis. Nan a haya boet”, el a bisa.

Maduro ta pensa cu comunidad ta pone atencion, pero tambe departamento den gobierno y polis ta cooperando y duna sosten pa cuido di dam.

Pa locual ta trata e compania di laba bari, lo tuma contacto cu nan y pidi pa cooperacion, pasobra nan ta haya cu hende mester ta mas consciente cu e dam. “E ta mustra yen pero ora temporada di secura bin ta bay tin limitacion di awa.”

Maduro ta duna recomendacion tambe, cu tin algun compania di laundry cu hopi biaha tin awa cu ta limpi, pero no por bay den sistema di riolering pasobra ta daña sistema di procesa awa. E ta pensa cu e compania por acerca laundry y nan por haci uzo di awa cu habon.

Segun Maduro ta comparti, esey por yuda mas y baha gasto pa no cumpra habon. E ta bisa cu ta un bon solucion pa e compania, y tambe pa agricultornan no confronta den par luna cu situacion di dam ta bashi of awa a bira salo.

“E situacion ta fastioso, pasobra esunnan cu ta afecta mas ta nos cunukeronan. Pero na final e maneho di e pos. Nos ta bezig cu proceso di registro di cunukeronan. Tin algun tin miedo of preocupacion, pero mi ta enfatisa cu no ta bay comparti informacion cu belasting of algo. E ta un registro interno pa nos sa cuanto cunukero tin”, el a informa.

Di e forma ey, Santa Rosa por mira kico cada hende ta produci, pa wak ki problema nan tin, pa nan departamento por busca un solucion. Maduro a bisa cu otro aña ta bay publica mas tocante e maneho nobo cu lo introduci.

Manera a menciona, ta ocupa cu e parti di registro, pero tambe na momento cu duna servicio nan ta exigi cu mester tin un prueba cu e tereno ta na e persona su nomber, y si e no ta na e nomber di e persona, lo duna informacion di con nan por pon’e riba su mesun nomber.

Nan no ta duna persona permiso cu ta ‘onderverhuur un huurgrond’, mirando cu e ta contra e contract cu gobierno ta stipula. Pues pa e motibo ey no ta duna permiso. Pero tin motibo pa e maneho cu ta bin.

Maduro ta bisa cu na final mester traha pa e bienestar di nan sector primario, pa cuida locual ta e recurso di cunukeronan, den caso di awa ‘nos ta streng na ken nos ta entrega nos awa’.

El a comparti tocante otro situacion di tanki. E ta bisa cu Santa Rosa tin dos tipo di truck di awa, un di 10.000 ton y 13.000 ton. Pa nan ta dificil pa pump cu capacidad halto cu ta saca awa lihe.

Nan no tin tempo pa bay yena tanki un pa un. Nan ta pidi pa hende acerca pa busca of traha un regenbak, of purba di busca tanki cu ta carga e capacidad di 10 mil liter of un sistema cu nan por conecta e tanki cu otro y asina por keda stroom.

Pa hende tampoco tin e tanki na halto riba un palet, mirando cu un palet no tin suficiente forsa y e siguridad di nan colega ta importante.

“Den caso asina nos ta duna informacion na cunukero y recomenda kico pa haci. Tin cu bisa cu nos a haya cooperacion di e mayoria ora di splica nan pakico e motibo di cierto maneho, nan ta compronde.”

Maduro ta bisa cu e peticion ta keda pa no uza awa y laga e dam pa cunukeronan, pero ta enfatisa cu proteccion lo bay tuma luga na Aruba pa locual ta trata cunucu y cria di bestia. “Lo keda traha pa yuda nan cu nan meta, cu ta cosecha cu nos tur como isla ta beneficia di dje.”

LEAVE A REPLY

Please enter your comment!
Please enter your name here