Siman pasa nos a haya noticia cu nos por a anticipa di basta tempo, pero lo a yama nos pa pesimista. Awor si definitivamente e compania Spaño, Repsol a dicidi di para e proyecto di exploracion di gas y petroleo den awanan di… bon, di ken realmente, pasobra segun nos opinion nunca Aruba a regla e derecho y debernan di e zona economico exclusivo di manera satisfactorio. Pero enfin, den e caso aki e no ta haci ningun diferencia pasobra no tin nada di haya.

Ta logico cu gobierno ta declara cu lo dicidi despues si ta bay busca otro partner pa e proyecto, o cu ta desisiti. Pa e insidernan den e materia aki sin embargo ta obvio cu practicamente no tin partner disponible cu, despues di e intentonan fracasa di Repsol, lo ta dispuesto pa inverti decenas di miyones den esaki. Simplemente e situacion den e sector no ta di tal indole cu facilmente ta saca e sumanan grandi aki pa explora, mientras tin un tremendo oferta riba mercado mundial cu ta mantene prijs di gas natural na un nivel bastante abao. Un situacion di oferta amplio cu lo keda pa varios aña.

Di otro banda, e abundancia di gas natural tin su influencia tambe riba mercado di petroleo. E refinerianan cu ta kima nan propio fuel oil den nan proceso ta hayando dia pa dia mas competencia di esnan cu tin acceso na gas natural, cu en todo caso na Merca ta como cuatro biaha mas barata cu kima fuel oil. Den nos propio region nos por mira e consecuencianan di esey, unda na e momento aki tur e refinerianan grandi, basa riba exportacion, a stop di opera: Curaçao, Aruba, St Croix y Trinidad & Tobago. E islanan cu tin refineria operando ta esnan cu tin refineria chikito pa abastece mercado local, manera na Jamaica, Cuba, Republica Dominicana.

Ademas di tur esaki, e situacion na Venezuela ta trece complicacion pa varios isla, pa cuminsa pa Aruba y Curaçao. Manera nos lectornan por a lesa, lo tin un acuerdo entre gobierno di Curaçao y Pdvsa, y gobierno di Venezuela, pa sigui opera e refineria pa un aña mas, mientras ta caba di regla e deal cu e compania Klesch Group pa tuma e refineria. Pero tin un pregunta clave pa contesta: con Venezuela – di Maduro – ta bay suministra crudo na Isla, si e licencia di Merca ta prohibi repatria ganashi pa Venezuela? Nicolas Maduro mester ta loco pa bay manda crudo pa e isla, pa despues mira e ganashi bay bunita asina pa e proximo gobierno democratico di su pais. Por opera talvez cu crudo di otro procedencia, pero probablemente na un prijs mas halto loke ta haci operacion rentable casi imposible.

Riba tur esaki ta bin resulta cu e empresa Klesch ta un partner menos bon cu loke a kere na inicio. Asina leu cu nos sa, nos ta e unico medio cu a informa di e papel straño cu e compania aki a hunga den e bidding di e reapertura di e refineria estatal Petrotrin di Trinidad & Tobago, unda nan a bisa sin mas cu nan no tin placa pa inverti y kier paga posteriormente cu impuesto, cu nan debe di tur manera… Asina e rumornan cu ta core na Curaçao, cu Klesch lo kier haya e refineria pa un simbolico dollar o florin, ta haya mas credibilidad, pero no ta amplia e perspectiva di un final feliz.

Cu e realidad aki, di un isla ruman cu si tin algo cu ta parce un refineria ainda, pero no por haya un compania serio pa drenta como partner, nos mester contempla e situacion aki na Aruba. Pa cuminsa no ta bay tin gas natural propio, ni pa e refineria, ni pa WEB. Esey ta haci cu, aparte di tur otro problema, lo mester tin gas procedente di otro pais pa por opera e refineria, si acaso. Pero, e problema principal ta pa sobrepasa e dilema grandi señala na inicio, cu aparentemente ningun di e companianan mayor den e sector di petroleo ta interesa den opera un refineria riba cualkier di e islanan den Caribe, pa motibo bon conoci. Esey ta haci cu automaticamente, si yega na un acuerdo cu un compania, esaki ta den e categoria di aventurero, o di peso pluma cu no por carga e operacion costoso di un refineria di mas di 300.000 bari pa dia. Den e sentido aki nos lo kier ta un fruminga pa mira e famoso lista di 25 operador cu nos prome ministro tin den reserva. Kitando e companianan grandi, di categoria ExxonMobil, ConocoPhillips, Shell, BP, Total, Chevron, no ta keda tanto candidato menor pero di suficiente caliber pa carga un operacion asina. Anto nos a lubida den tur esey cu gobierno anterior mes a descarta e probabilidad di reapertura como refineria, sino cu a considera esaki solamente como upgrader pa crudo ultrapisa di Orinoco…

Nos ta yegando rapidamente na e momento unda cu gobierno lo mester duna cara y bisa Aruba cu nos futuro no lo encera un refineria, y cu nos mester reorienta den direccion di otro actividad economico. Tanten nos ta keda bula di un pia riba otro y no ta tuma decision, nos ta keda pega den awe, y sin tin mañan.

 

LEAVE A REPLY

Please enter your comment!
Please enter your name here