Scandal di carni putri: Chile y China ta suspende importacion Brasileño

Dialuna gobierno di Chile a decreta e ciere temporal di tur importacion di carni for di Brasil, despues di e scandal di alteracion di producto den freezernan grandi destina na exportacion, ministerio di agricultura di Brasil a informa.

“E suspension di importacion for di mercado di Brasil ta temporal. Te na momento cu Brasil por informa si ta existi algun freezer autorisa pa exporta pa Chile,” Carlos Furche, ministro di agricultura a skirbi riba su cuenta di Twitter. Brasil ta e di dos proveedor di carni di Chile cu 37 mil ton pa aña, mientras cu Paraguay ta e prome exportador cu 39 mil ton, segun dato di gobierno di Chile.

Na luna di november ministerio di salud di Chile a duna un alerta pa e posibilidad di contaminacion di carni cu un malesa conoci manera “paratosis” di carni cu a ser importa di Brasil. Despues e benta y distribucion di e producto aki a keda prohibi. China a congela e posibilidad cu desde Brasil producto manera carni por drenta; esaki por genera hopi problema pa e pais Sur Americano. Entre luna di juni di 2015 y januari di 2016, China a cumpra mas di 500 miyon dollar na carni di baca for di Brasil, esaki ta un 16% di henter exportacion Brasileño.

China asina a pasa dilanti di paisnan manera Egipto y Hong Kong, cu tabata e principal cumpradornan di carni Brasileño. Dialuna Comision Europeo a solicita Brasil pa kita di inmedianto for di lista  di establecimento autorisa pa exporta pa Union Europeo, e nomber di freezernan cu ta envolvi den caso di corupcion. “Nos a solicita Brasil pa elimina inmediatamente tur establecimento envolvi den e scandal di e lista cu a keda aproba pa Union Europeo,” Enrico Brivio, vocero di Comision Europeo a splica.

Union Europeo a solicita tambe pa Brasil suspende e certificacion di e lugarnan ey durante e proceso cu nan ta for di e lista”, vocero di ehecutivo a bisa. Di e grupo di 21 freezer cu ta envolvi den e scandal y cu a keda descubri pa polis federal di Brasil, cuatro di nan tabatin permiso pa exporta pa 28 pais di Union Europeo. Sur Corea a bisa cu nan ta reforsa tur supervision riba nan importacion di carni y galiña di Brasil, y asina tambe nan a blokeia temporalmente e benta di producto di galiña for di e empresa BRF.

E ministerio di Sur Corea a bisa cu den futuro e proveedor di galiña di Brasil mester mustra un certificado sanitario cu lo ser emiti pa gobierno di Brasil. Mas di 80% di 107.400 ton di galiña cu a bin aña pasa pa Sur Korea tabata bin for Brasil, y casi mita di esaki a ser entrega pa e empresa BRF.

Diabierna polis di Brasil a bisa cu inspectornan sanitario tabata haya soborno for di hende di empresanan di producto congela pa asina autorisa e benta di cuminda cu no tabata bon mas pa consumo humano. Mas di 30 hende a keda deteni te na e momento aki, tres freezer a ser cera temporalmente y 21 di nan ta bao investigacion. Entre e empresanan cu ta sospechoso tin empresa manera JBS, BFR y Peccin. E empresanan aki ta empresa hopi importante pa e pais cu ta conoci como exportador mundial di carni di baca y galiña.

E scandal a sali na luz publico algun dia prome cu e inicio di un rondo di negociacion entre Brasil y Union Europea dialuna na Buenos Aires, hunto cu otro paisnan di Mercosur tambe. Brasil ta miembro di Mercosur.

You May Also Like

Venezuela: Guaido ta puntra militarnan kico nan ta warda

Presidente encarga di Venezuela, Juan Guaido, a puntra ayera na e militarnan di e ...

Banco Mundial y IMF ta confirma caida di 10% den Venezuela su economia

Banco Mundial y Fondo Monetario Internacional (IMF) a confirma un mehoracion den e paisnan ...

Violencia y crimen: menasa pa Caribe

Paisnan den Caribe ta gaba cu nan ta ofreciendo un ambiente idilico, unda playanan ...

Turks & Caicos: Invadi pa migrante Haitiano

Islanan Turks & Caicos ta sufri un invasion di Haiti, segun lider di e ...

Despues di casi 100 ora atrapa, un lora a keda rescata di entre escombro na Mexico

Mientras dos teremoto mas a keda registra, atencion den e trabao di rescate a ...

Venezuela: Escasez di gasolin pa via di exportacion

E escasez di gasolin di siman pasa na Venezuela tabatin parcialmente como causa e ...