Ayera a tuma luga e parada di carnaval di scolnan secundario di Oranjestad. Un total di nuebe scol secundario a participa den e parada di carnaval unda e hobennan a baila, jump y disfruta ariba e musica di carnaval di Aruba.
Mon Plaisir College Mavo, Havo y VWO, EduCampus, Colegio Arubano, La Salle College Mavo, Maria College Mavo, Colegio San Antonio, Ceque College, International School of Aruba, Colegio EPI y Universidad di Aruba tabata e scolnan cu a participa den e parada escolar.
Un cantidad grandi di hoben a baila y jump ariba e ruta di e parada cu a sali for di Aruba Entertainment Center ariba Avenido Milo Croes, a bay direccion Vondellaan, a yega retonde Las Americas y a termina na Plaza Turismo (Lineair Park).
Ayera mainta tambe a tuma luga e parada escolar di scolnan secundario na San Nicolaas na unda un total di cuater scol secundario a participa den e jump up escolar aki. Ademas di esaki varios otro scol rond di Aruba tambe a tene nan celebracion di carnaval ayera mainta ya cu esaki ta e ultimo dianan di celebracion di carnaval 70.
Awe Aruba ta celebra su parada grandi na San Nicolaas y mañan diadomingo ta e gran parada di carnaval na Oranjestad pa asina culmina cu e celebracion di Carnaval 70.
