Ayera mainta scolnan di districto di Noord tambe a bira presente den e Carnaval 70 na unda basta mucha a canta, balia y disfruta di e ambiente di Carnaval hunto cu docentenan y mayornan ken tambe a duna nan muestra di apoyo pa e parada di SUN (Scolnan Uni di Noord).
For di 8.30 di mainta Compleho Deportivo Frans Figaroa a ricibi e alumnonan di Agnes Kleuterschool, Colegio Felipe Tromp, Scol Preparatorio Cayena, St. Aloysius School, St Anna School y Scol Preparatorio Aurora na unda nan a cana y hasta a balia e canticanan mas reciente di Carnaval 70 cu presencia tambe di e Reinanan y Prins cu Pancho di cada scol.
Pa casi 10.30 di mainta despues di a recore parti di Montaña, Sabana Liber finalmente e parada a culmina na misa di St. Anna di Noord, e muchanan a yega un tiki cansa pero esey no tabata impedi pa por termina e mainta cu weganan y otro actividadnan na cada un di nan scolnan.
Ambiente tabata super dushi na unda Cuerpo di Polis tambe tabata presente pa e siguridad di tur y muchanan por a disfruta un poco di full e temporada cu mañan ta bay finalisa cu e parada grandi di Oranjestad y pa 7.30 di anochi na Harbour Arena ta bay tin e kimamento di Momo.
Potretnan ta di e parada di muchanan di St. Anna School y di e reinita hopi bunita y dushi di Klas 1B di nomber Dersieny.
