Secretario di Estado di Hulanda a elogia proyecto ‘Urban Bee Farming’ di Stichting Rancho

Alexandra Van Huffelen, Secretario di Estado di Hulanda a bishita Stichting Rancho na nan localidad nobo na Visstraat 1 na Oranjestad siman cu a pasa net prome cu el a bandona Aruba.

Esaki no ta prome biaha cu un Secretario di Estado di Hulanda ta topa cu Stichting Rancho, cual pa e fundacion e bishitanan aki ta refleha un logro grandi.

Clifford Rosa, presidente di Stichting Rancho ta splica Bon Dia cu bishita di Secretario di Estado Van Huffelen – como su rutina di trabao manera a wordo informa pa VNO – a bay hopi ameno y tabata un encuentro positivo. E fundacion a prepara pa asina duna Sra. Van Huffelen locual cu el a bin haci, cual ta pa scucha ideanan y soñonan pero tambe pa bin den contacto cu comunidad akinan na Aruba.

“Cu e bishita aki na Stichting Rancho el a haya su mes cu e comunidad di Stichting Rancho pero tambe e comunidad mes di Rancho. Nos a prepara pa dun’e un bista di kico tur Stichting Rancho a logra den ultimo 12 aña,” Sr. Rosa ta bisa. E fundacion a demostra cu nan t’ey pa conserva e historia y cultura di e bario Rancho cual ta e curason di Oranjestad, y esaki ta sigur e tema cu a hala atencion di Hulanda den sentido cu cultura y herencia ta hunga un rol hopi importante. Stichting Rancho a yega di haya bishita caba for di un Secretario di Estado di Hulanda, pues no ta prome biaha, y si nan ta wordo poni den e agenda di bishita ta algo cu segun sr. Rosa ta refleha un logro bastante grandi pa e fundacion.

A encanta idea di ‘Urban Bee Farming’
“Un bon feedback cu nos a haya ta cu nos honing tin un bon smaak,” sr. Rosa ta comenta. Sra. Van Huffelen a purba e honing cu e fundacion ta produciendo aworakinan riba nan propiedad cu nan proyecto di Urban Bee Farming. “Mi ta kere e ta un parti crucial mirando cu si bo ta traha den agricultura, biodiversidad, flora y fauna, bo sa kico ta e importancia pa mantene cosnan den balans, y kico ta mas miho cu tin Urban Bee Farming manera cu nos ta present’e cu ta produci honing,” segun Sr. Rosa. Locual cu nan tin cu esaki na e fundacion aworakinan ta algo cu nan por demostra e producto cu ta honing local, y banda di esaki tin e urban gardening, sin laga afo e idea cu tin pa e parti di agricultura, cria di bestia y pesca. Pero tambe sigur e parti di transporte cu ta hunga un rol hopi importante.