E tabata un sorpresa pa Secretario di Estado encarga cu Asuntonan di Reino, Eric van der Burg pa tende cu Prome Minister Mike Eman lo entrega su funcion pa fin di aňa. Asina e titular a bisa durante su conferencia di prensa digital cu medionan di comunicacion di e islanan den Caribe ayera.
Otro siman Van der Berg lo ta na Aruba pa reunionnan cu Gobierno y lo atende e despedida di Sr. Eman como hefe di Gobierno. “Mi a papia cu Prome Minister Eman na Hulanda prome cu el a anuncia cu e lo baha di e cargo, como tal e decision di entrega su funcion tabata un sorpresa total pa mi, mescos cu pa hopi na Aruba. Mi no tabatin ningun idea cu esaki tabata na caminda.”
E Secretario di Estado a mustra cu mas cu esey e lo no bisa, ya cu no ta trata aki di un asunto di Hulanda, sigur no ora ta trata e reemplaso di Mike Eman. “Nos lo traha cu e siguiente lider di Gobierno di e mesun bon forma cu nos ta haciendo awor aki te fin di aňa cu Sr. Mike Eman. Pa mi e no ta haci diferencia ken ta e Prome Minister di Aruba, sino con hunto por percura cu ta fortifica Reino Hulandes den su totalidad.” Van der Burg a enfatisa cu e enfoke lo sigui ta e colaboracion cu Aruba pa haci tanto Gobernacion y economia di e isla mas fuerte. “Mi no ta haci ningun distincion riba ken ta na mando na Aruba.”
Van der Burg a bisa si cu el a combersa cu Prome Minister Eman, durante cual el a expresa duele pa e decision, “y mi ta convenci cu nos lo sigui traha bon cu otro pa e siguiente seis lunanan. El a sigura mi cu e lo sigui hinca tur energia den su trabou te na momento cu e lo baha.”
Secretario di Estado Eric van der Burg finalmente a comenta di lo kier traha cu tur Prome Minister di Aruba na e forma con el a traha cu Mike Eman, cual el a describi como “constructivo.”
