Hulanda tin un problema particular di dos aspecto contradictorio na mes momento. Ta trata di congestion den e red di distribucion di electricidad, cu ta origina den demasiado demanda di consumidor y hopi biaha na mesun momento. Esaki ta causa ‘peak’ grandi den e cantidad di coriente cu mester move den e sistema, cu ta causa un sobrecarga demasiado grandi. E congestion ta debi tambe na oferta na momento inoportuno di productor priva, na cas y empresa. Gobierno tin intencion pa tanto amplia e red mas rapido ainda y na mes momento trata di usa esaki di un forma mas inteligente.
E momentonan di mas demanda di coriente na e pais ta entre 16.00 y 21.00 or, tanto di vivienda como empresa. Na cas tin un uso creciente di sistema di airco tipo inverter cu durante invierno por usa como calefaccion tambe. Tambe tin mas y mas uso di cushina riba coriente, ta charge bateria di auto (electrico) na cas, tur esaki destina na reduci uso di gas natural, cu pa mas di mitar siglo tabata e forma mas usa di energia, pa e solo hecho cu e pais tabatin su propio produccion grandi di gas natural. E epoca ey a termina y e pais ta den un transicion grandi den direccion di energia renovable. Esaki ta tuma lugar pa gran parti a traves di produccion di energia solar y di biento, tambe via produccion di energia pa e propio ciudadano mes na cas.
Na e momentonan di demanda halto aki tin demasiado congestion riba e red, tanto di demanda como di oferta di miyones di productor. Esaki ta causa un tipo di ‘fila riba autopista’ electrico, loke por ocasiona sobrecarga y posible fayo den e suministro. Pa evita esaki ta necesario tuma cierto medida. Un di nan ta crea un lista di espera pa empresa cu ta desea di haya un conexion nobo of di mas potencia.Esey tin como consecuencia cu nan no por haci e transicion spera di por ehemplo gas pa coriente (berde). Na su turno esaki por tin efecto economico negativo ya cu e empresanan aki no por crece y ta produci menos y ta inverti menos tambe.
E medidanan proyecta pa garantiza cu den e proximo añanan tin suficiente espacio dentro di e red nacional, ta varia, segun region o provincia, pa loke ta rapidez di implementacion. E administradornan di e sistema ta investiga pa cada region ki medida ta necesario pa mantene e red di distribucion confiable.
Pa combati congestion riba e red, ta necesario amplia e red mas pronto posible. Anualmente e diferente administradornan di e red ta inverti como 8 biyon euro den su expansion. Entre otro ta haci esaki a traves di emision mas rapido di permiso y eliminacion di obstaculo den e proceso di construccion, cu tambe ta encera diferente permiso. Pa emiti permiso mas rapido ta dicidi di forma acelera ken ta emiti permiso y unda e proyectonan principal di energia lo bay. Tambe ta adapta legislacion pa recorta tempo pa aproba proyecto.
Proyecto di ampliacion por haya un indicacion manera “di importancia social” y asina haya prioridad riba otro proyecto. Tambe ta dedica atencion na mehora e situacion ambiental den region unda ta construi hopi infrastructura di alto tension.
E medidanan inmediato pa reduci congestion riba e red ta encera entre otro uso di bateria of gas natural pa combati consumo excesivo na e momentonan mas dificil. Tambe escogencia di cierto grupo di prioridad na momento di congestion, loke por yuda alivia carga riba e red, manera bateria grandi. Servicio basico y di seguridad nacional, por ehemplo hospital y aparato policial/militar, tambe scol, vivienda y transporte publico tin prioridad.
Pa reduci consumo den e oranan di mayor congestion, ta stimula uso di coriente na otro momento ora tin menos congestion. Pa facilita esaki, gobierno ta pone subsidio disponible pa empresa por contrata experticio pa por ehecuta nan plannan, a pesar di e escasez di electricidad, cu ta obliga nan busca un instalacion mas pisa. Tambe ta stimula e formacion di asina yama ‘hub di energia’, cu ta e colaboracion di empresa den mesun vecindario cu ta coordina consumo entre nan pa garantiza cu tin suficiente na tur momento y cu tin espacio pa otronan tambe.
Na nivel di hogar/persona individual tin varios cambio tumando lugar. Bao impulso di e transicion di gas natural pa uso di electricidad a yega na e fase unda tanto uso como produccion di electricidad na nivel di cas ta obliga uso di sistema sofistifica pa tanto usa como produci coriente na cas. Esaki entre otro via uso di bateria pa conserva e propio electricidad cu no ta consumi directamente, y pa entrega esaki na e red na momento cu no tin congestion. Tur esaki ta bay acompaña pa uso di tarifa variable pa consumo di, y suministro na e red. Pa esaki cada bateria na cas tin su propio computer cu ta calcula na ki momento ta suministra energia na e red, ademas cu e reserva ta disponible pa propio uso.
E medidanan proponi ta exigi bon cooperacion na nivel nacional, provincial y municipal y ademas cu e empresanan proveedor di electricidad. Loke ta tumando lugar riba e tereno aki ta duna un bon impresion di e complehidad di produccion y distribucion na un pais, cu no tin tanto recurso energetico natural mas y ta haci un transicion pa energia alternativo y renovable, cu e ciudadano individual como productor y consumidor. Un proceso cu su problemanan, pero manehable.
