Durante un conferencia di prensa di Crisis Team Ronella Croes CEO di ATA tabata presente, el a trece dilanti e ultimo desaroyo pa turismo di Aruba cu e proyeccion pa e aña aki.
ATA ta proyecta cu nan lo por ta cerando aña 2021 cu un recuperacion di 73% di cantidad di bishitante compara cu aña 2019, “e proyeccion ta uno optimista, e ta riba un scenario cu nos tabatin proyecta pa e aña aki y ta refleho di pushnan adicional cu ta dunando resultado”, Croes a señala.
Mirando e importancia di recuperacion economico cu ta depende solamente di turismo, e perdidanan cu nan a experiencia e ultimo dos luna y cu ta sigui causa impacto te cu resto di aña tin su peso y ta lo cual mester evita segun Croes a indica.
Door di impacto di variante Delta di Covid-19 na luna di augustus Aruba a perde 15.000 bishitante, compara cu loke nan a proyecta pa e luna ey, na september e perdida tabata di 10.000 bishitante y pa luna di october y november nan ta proyecta tambe cu lo tin 10.000 bishitante menos di lo cual inicialmente nan tabatin proyecta.
Pa luna di december Croes a sigura cu nan mirando cu nan lo por ta riba e 100% di e recuperacion pa loke ta trata e cantidad di bishitante den luna aki compara cu december 2019, esaki ta nifica tambe cu pa luna di december 100.000 bishitante por bin Aruba. Variante Delta tambe a haci impacto cu cantidad di casonan positivo pero awor cu e casonan ta bin disminuyendo, ainda Aruba ta riba nivel halto di risico di parti di Merca na unda nan ta desconseha pa biaha pa Aruba y a causa impacto na e segmento di biahenan corporativo, corporacionnan internacional ta biaha bin Aruba cu nan empleadonan y basicamente nan no lo tuma e riesgo pa haci esey, e ta un riesgo innecesario, loke a afecta aña 2021 y tambe 2022.
Un otro ehemplo di perdida cu nan a experiencia recientemente ta cu Inglatera tambe tin Aruba riba un nivel di riesgo desbentahoso, esaki a stroba un operacion di vuelo non-stop di parti di Inglatera di inicia e aña aki, aunke e casonan positivo pa Covid-19 ta bahando ta mira e capacidad disponibel na ICU y e hecho cu ta mandando personanan na Colombia, loke den caso di Inglatera ta pone cu Aruba no ta sali for di e nivel di risico desbentahoso ainda.
Dia 29 di september Italia a anuncia cu ta permiti pa biaha pafo di Europa pa loke a pone Aruba den un grupo di seis destinacion mundial cu un maneho menos exigente pa e biahe, den caso di Italia por biaha cu menos restriccion pa Aruba banda di otro luganan como Maldives, Mauritius, Republica Dominicana y dos luga na Egipto.
Pero, igualmente e impacto di mas grandi sigur ta den mercado primario cu e nivel di riesgo halto cu Aruba ainda tin, cu ta e mercado Mericano, akinan Croes a splica cu ATA y DVG hunto cu minister plenipotenciario na Washintong, Joselyn Croes, nan ta lobbying pa asina baha Aruba for di e nivel di riesgo unda cu e ta aworaki.
E cantidad di casonan y e desaroyo recien ta pone cu Aruba por move den un nivel di risico menos halto, nan ta espera cu e cantidad di bishitantenan lo mustra un subida mensual pa e resto di aña, pa october nan ta espera 70.000 bishitante, pa november por yega na 80.000 y na december por subi te na 100.000, algo cu ta destaca pa luna do november ta cu Aruba lo ta inaugurando un vuelo nobo di Frontier Airlines for di Miami riba 20 di november. Pa aña 2022, ATA a indica cu nan ta premirando un recuperacion di cantidad di bishitantenan di 95% compara cu aña 2019, esaki ta pa esunnan cu ta bishita cu avion cu por nifica cu Aruba por ta surpasando e cifra di un miyon bishitante pa otro aña.
Si nan ta agrega e turismo crucero y cantidad di bishitantenan cu barco, Aruba lo por ta yegando na 1.5 miyon bishitante total pa otro aña, asina mes el a indica cu diferente trabounan ta tumando luga pa agilisa e proceso na aeropuerto y prepara pa un temporada halto cu ta den porta, den parti aki ta indica cu turistanan, entre otro, a haci un cambio pa loke ta trata proceso di inmigracion.
Segun Caribbean Tourism Organization, Aruba por tin e grado di mehoracion mas fuerte den Caribe momentonan aki, nan ta mustra un crecemento di 96% compara cu e mesun periodo na 2020 na unda cu Aruba ta wordo sigui pa St Marten y Republica Dominicana, tur otro destinacion den grupo aki ta mirando un grado di crecemento compara cu 2020 di hopi mas abou. E competencia ta hopi mas fuerte cu nunca pa gana e biaheronan potencial manera Croes a sigura cu ATA ta prepara pa esaki y participando den competencia lo ta uno sumamente fuerte pa pusha temporada halto cu ta na caminda y pusha recuperacion pa 2022. Tambe tin discusionnan tocante e medidanan di parti di sector priva, di esaki Croes a bisa cu algun di nan ta di acuerdo, otro no, pero sigur nan ta pidi pa haci control y tuma pasonan contra esunnan cu no ta cumpli cu e rekisitonan, autoridadnan cu ta controla y ta tuma pasonan no por yega na tur establecimento comercial manera Croes a sigura, “pues den afan di normalisa gradualmente y realisa cu Covid t’ey pa keda, ta pensa riba e responsabilidad cu cada individuo y negoshinan mester carga”.
Nan ta compronde e ponencia di Comerciantenan Uni entre otro, na unda cu nan ta señala cu no tin un solucion bulletproof pa cu situacionnan na unda tin medidanan y tin negoshi cu no ta tene nan mes contra esun cu si ta cumpli unda Croes a manifesta cu nan tin comprension pa esey pero e ta kere cu mester tin comprension tambe pa si tin cualkier medida cu ta wordo implementa, mester tin control pero no por garantisa esey na 100% pa motibo cu esey den practica ta imposibel.
