Raad van Advies riba 26 di Mei 2021 ta conseha pa wanta cu tratamento di e ley di iniciativa Integridad Ministers, te ora cu inclui adaptacionnan cu e instituto a mustra cu falta.

Parlamento ta programa pa trata e proyecto di ley Dialuna awor, cuminsando 9’or di mainta. Aunke Raad van Advies ta sostene e pensamento di e ley, e instituto no ta de acuerdo cu e contenido manera cu e ta awor aki. Es mas, den su conseho, Raad van Advies tabata hopi skerpi.

Raad van Advies a haya siete (7) diferente version di e ley pa conseha riba dje, den un periodo di seis (6) aña. Dia 9 di September 2020, Raad van Advies a manda e ultimo conseho riba e proyecto di ley y Parlamento a trata e ley, pero no a haya mayoria pa sostene, pues e ley no a pasa.

E instituto ta bisa den su conseho cu e hecho cu no a pasa e ley despues di tur e intentonan aki, ta pone cu no por conclui otro cu tin falta di un deseo real pa tuma un decision pa pasa e ley di Integridad di Minister y tambe falta accion. Mas ainda Raad van Advies ta bisa cu tur esaki ta lanta pregunta riba madurez democratico y boluntad pa trece cambio real. Aunke cu Raad van Advies ta reconoce e insistencia di e Parlamentarionan cu a tuma e iniciativa pa e ley, e ta di lamenta cu ainda Parlamento no a concretisa e proceso legislativo pa screen candidatonan pa Minister. Consecuentemente no tabatin un ley pa screen candidatonan pa Minister despues di ultimo eleccion na Aruba.

Un punto yamativo ta cu Raad van Advies ta bisa cu e ley ta papia solamente di candidatonan pa bira Minister y cu e ley no ta conta pa candidatonan pa Parlamentario. Esaki ta contrario na locual mr. Evelyn Wever Croes, Minister President y tambe formado a bisa na varios ocasion, esta cu e ley lo inclui screening di Parlamentarionan. Mas ainda, Raad van Advies ta haya cu falta hopi detaye den e ley. Tin aspectonan den e proyecto di ley cu falta motivacion, incluso e splicacion con a yega na determina e castigonan. Tampoco ta cla si e ley ta conta pa Minister Plenipotenciario, particularmente mirando cu esaki ta trata un funcion cu mas bien ta uno diplomatico.

Como tal, Raad van Advies ta aplaudi cu e idea tras di e ley, pero no por haya su mes den e contenido y ta pidi pa no trata esaki, te ora cu inclui tur recomendacion. Mester bisa cu e Nader Rapport, esta e ley adapta cu recomendacionnan di Raad van Advies ta locual cu ta keda presenta na Parlamento Dialuna awor, unda a bisa cu a tuma varios di e recomendacionnan di Raad van Advies. Bon Dia Aruba lo amplia riba esaki den un proximo edicion.

LEAVE A REPLY

Please enter your comment!
Please enter your name here