Minister di Finanzas, Asunto Economico y Sector Primario, Geoffrey Wever, ta informa cu Gobierno di Aruba a entrega e Ontwerp Begroting 2027 na College Aruba financieel toezicht (CAft) pa conseho, conforme e proseso legal.

Despues di ricibi e conseho di CAft, gobierno lo entrega e presupuesto na Raad van Advies, acompaña cu su reaccion riba e conseho ricibi. Meta ta pa Parlamento di Aruba ricibi e presupuesto dentro di e termino legal prescribi.

Presupuesto 2027 ta mas cu solamente un obligacion constitucional, e ta representa un paso importante den modernisacion di maneho financiero di Aruba. Pa prome biaha, e presupuesto ta wordo construi gradualmente riba e principio di policy-based budgeting, un sistema nobo caminda maneho, presupuesto y resultadonan ta wordo conecta directamente. Esaki ta significa cu e recursonan publico ta wordo alinea di forma mas directo cu e prioridadnan di maneho di Gobierno y cu e resultadonan cu gobierno kier logra pa pueblo di Aruba. E sistema nobo tambe ta fortalece transparencia, rendicion di cuenta y e posicion di Parlamento pa evalua y controla con recurso publico ta wordo inverti.

Presupuesto 2027 ta sigui e rumbo fiha den Programa di Gobernacion AVP-FUTURO 2025-2028. E ta enfoca riba finansas publico duradero como fundamento pa fortifica poder di compra, stimula actividad economico, diversifica nos economia y aumenta bienestar di pueblo. E presupuesto ta crea e balansa entre disciplina financiero y inversionnan strategico, permitiendo pa Gobierno sigui construi un economia mas resiliente y cu ta crea mas oportunidad pa futuro.

Como parti di e structura nobo di e presupuesto, pa prome biaha ta introduci un clasificacion mas transparente di gastonan y entradanan publico . Esaki ta distingui claramente entre gastonan operacional, gastonan di maneho y gastonan di financiamento, loke ta facilita un mihor comprondemento di con recurso publico ta wordo distribui y utilisa.

Ademas, e Memorie van Toelichting ta brinda un bista mas amplio di prioridadnan di cada ministerio, cu informacion financiero y di maneho integra pa fortalece e proceso di decision y supervision democratico.

E presupuesto ta basa riba un perspectiva economico positivo pa Aruba. E pronosticonan indica un crecemento nominal di economia di 4.1% pa 2027 y un saldo positivo di 1%, manteniendo conformidad cu e normanan di sostenibilidad financiero. E resultadonan aki ta confirma cu disciplina presupuestario y maneho financiero responsabel ta crea espacio pa sigui inverti den prioridadnan nacional sin compromete stabilidad financiero di Aruba.

“Un presupuesto no ta simplemente un coleccion di cifra. Ta e instrumento principal cu gobierno tin pa converti maneho den resultado concreto pa nos pueblo. Cu Presupuesto 2027 nos ta haci un paso importante pa conecta cada florin cu un obhetivo cla, un prioridad di maneho y un beneficio pa comunidad. Asina nos ta sigui construi un gobierno cu ta mas transparente, mas responsabel y cu ta maneha recurso publico cu vision pa futuro,” Minister Geoffrey Wever a declara.

Preparacion di Presupuesto 2027 a tuma luga bou coordinacion di Ministerio di Finanzas, Asunto Economico y Sector Primario, den colaboracion cu tur ministerionan, Directie Financiën y Directie Wetgeving en Juridische Zaken. Gobierno ta gradici tur funcionario y specialista cu a contribui na e proceso, cu a resulta den un presupuesto cu no solamente ta cumpli cu e normanan legal, pero cu tambe ta fortalece e capacidad di gobierno pa dirigi, evalua y realisa e prioridadnan strategico di Aruba durante e añanan binidero.