Directiva di S.T.A. a tuma nota di un comunicado di e sindicato cu a pidi referendum na ‘AAA NV’. Locual ta straña STA ta, con e abogado Figaroa ta bin dilanti pa purba tira santo den wowo di hende cu yen di co’i loco di Corsou.

Locual –segun STA– abogado Figaroa mester splica e empleadonan di AAA NV, ta cu ta su propio partner S. Faarup cu ta hinca den board di AAA NV a firma pa prolonga e contract cu Guardian Group pa locual ta e pensioen di e empleadonan, y asina manda un puñal den custia di STA y tur e empleadonan.

Importante ta p’e splica con esaki a bay y con su partner, na haltura di e deseo di e empleadonan di AAA NV, pasobra e tambe a wordo poni na haltura debidamente di e situacion via di e oficina di minister, y toch e partner di Figaroa a claba e pober trahadonan un puñal, segun directiva di STA.

Ningun empleado di aeropuerto kier pa ningun sindicato bin coba den nan bonus di fin di aña y ni bay paga dobel mas contribucion pa haya nada. STA su concepto a ser entrega caba na gerencia di AAA NV y ta cla pa cuminsa negocia.

“Si e sindicato di Figaroa no logra haya mayoria durante e referendum, e mester hala kita pa laga STA negocia, asina simpel e ta, y e sa masha bon. Of e ta kere cu su partner por bay manipula cu esaki tambe? Ta tristo pero berdad cu un par di persona cu practicamente a comete fraude cu nan manipulacion di on call y raporta ‘call back’ pa capricho kier bin cu un otro sindicato y bruha tera den porta di negociacion”, STA a declara.

“Meneer ‘urke’ a bay haci 4 ‘snoepreis’ riba custia di AAA NV y te awe no sa su trabao y pasobra AAA NV a para su fiesta, ta rabia y ta tira culpa riba STA y ‘tientji pega schroef’ cu tabata strica 320 florin pa traha 30 minuut, tambe su fiesta a caba. “

Directiva di STA, un biaha mas, ta haci un apelacion na tur e empleadonan di AAA NV pa no bay vota. Ningun hende por obliga bo haci’ele of no haci’ele, t’abo ta dicidi. “Nos concepto ta cla y tur esunnan cu kier wak e concepto, por wak e cerca cualkier delegado di STA trahando na AAA NV. Dia 28 di augustus 2019 negociacion ta bay cuminsa y STA ta cla p’e reto un biaha mas; y pa locual ta e pensioen, STA ta bay hiba AAA N.V. corte.” Te akinan e comunicado di directiva di sindicato S.T.A.

 

LEAVE A REPLY

Please enter your comment!
Please enter your name here