image.jpeg

Den luna di maart (dianan 2 pa 21) Camara di Comercio (KVK) a tene un encuesta riba opinion di comerciantenan den caya grandi riba Aruparking. Segun informacion di Teo Croes director di Arubus / Aruparking, nan a haya e encuesta prome cu el a wordo publica. Reaccion cu Sr. Croes tin ta cu ta algo cu KVK a haci, pues e no por bisa si e ta bon haci of no pero tambe ta remarca cu e no ta duna un mal impresion di e sistema di Aruparking. 

Banda di esaki Aruparking tambe ta trahando riba un encuesta ya for di basta dia, conduci pa un compania independiente cual pronto tambe lo bin cun’e y lo publica esey. “Aruparking ta un proyecto cu tin hopi contra di dje, pero si mira ultimo diasabra nan cu a pasa, den caya tur caminda tabata yen di auto y caya yen di hende, pues e tin bon efecto.” E ultimo siman nan a aumenta den uzo y si compara e cifranan ta mira cu a bay dilanti cu 4800 extra na uzo den un siman. Tambe mester mira cu e ta mustra hopi mas nechi compara cu antes como ya no tin tanto auto riba acera y con cu ta para, Sr. Croes a bisa.

Bon Dia Aruba a cuestiona si e contestanan den e encuesta di KVK ta algo cu por conta riba dje mirando cu el a wordo teni net tras di e periodo di 6 luna cu ta e periodo calcula pa persona acepta e proyecto. sr. Croes a bisa cu esaki ta basa riba e periodo di aceptacion na Corsou pero e ta dificil pa bisa despues di cuanto tempo ta bon momento pa haci evaluacion. Sinembargo segun Sr. Croes, ta mira si cu tur siman tin mas uzo. Siman pasa a saca potret den diferente area pa controla si tin fluho di auto, y pues cu no ta e mesun auto ta keda para. Unda cu ta mira cu berdad den algun caso e mesun auto t’ey ora a controla cada ora, pero mayoria di nan ta un ‘turn over’.

Turista

Pa loke ta e aspecto di turista cu a wordo trata den e encuesta, unda personanan a duna comentario riba e hecho cu ta varios auto di turista ta haya klem, el a bisa cu e cantidad a baha masha hopi mes. Di locual tabata wordo geklem anteriormente el a baha y locual a yuda cu esaki ta e cantidad di borchi cu a pone y cu luganan cu ta huur auto tur tin papel di instruccion y informacion pa turista. Via di e flyernan ta wordo informa cu Aruba tin sistema di paga pa parkeer. Ademas di esey e ta riba website tambe, el a agrega. Den cada auto di huur tambe e siman aki ta terminando pa bin cu algo di colga na e spiel cu tur e informacion di Aruparking riba dje. 

Pa loke ta e pago cu turistanan ta haci ora cu nan no sigui e instruccionnan, nan ta keda asombra hustamente cu ta 43$ nan tin cu paga, pasobra nan ta compara esaki cu na Merca. Na Merca e cantidad aki ta hopi mas pasobra ta considera e multa, e taxi y e compania cu a touw e auto. El a bisa a pesar di esaki e parkeerwachters ta enfocando hopi riba turista na momento cu ta controla rond. Unabes cu nan wak un auto di huur nan ta percura pa bay cerca nan y mustra nan unda nan mester para nan auto y unda cu no. Sr. Croes a bisa e mes tin ora ta haci esaki riba diasabra, pa e tambe tin un miho bista di con e sistema ta bayendo y locual cu por drecha. 

Informacion di encuesta KVK

Segun e publicacion di e encuesta di KVK, un total di 62 compania cu 1107 empleado a participa na e encuesta. For di e 1107 personanan aki, solamente 183 (16.5%) a bisa cu nan ta haci uzo di Permiso pa para auto regularmente. A pesar di esaki 54.1% di esunnan cu a contesta ta bisa cu e situacion pa parkeer a mehora y ta haya esey mas facil pa haya luga di para. 89.5% ta haya cu e ta necesario pa mehora polisa nobo di parkeer.

LEAVE A REPLY

Please enter your comment!
Please enter your name here