Aruba ta aparece entre e economianan mas resistente di region Caribe segun un indice nobo desaroya pa midi con diferente pais ta prepara pa enfrenta crisis economico y otro shock externo. E “Resilience Index Caribbean” (RICa), prepara door di Economisch Bureau Amsterdam, ta pone Aruba na di cinco lugar entre 18 pais di Caribe, loke ta indica cu e pais tin un base relativamente fuerte, aunke ainda tin varios desafio cu mester atencion.

E indice a ser crea pa ofrece un bista mas completo di resistencia economico despues cu pandemia di COVID-19 a mustra con hopi economianan den Caribe tabata vulnerabel pa cambio externo. Segun e estudio, un economia resistente no ta depende solamente di su nivel di ingreso of tamaño, sino tambe di factornan manera calidad di institucionnan, situacion financiero, sostenibilidad, demografia, geografia y capacidad di gobierno pa responde na crisis. Pa midi esaki, RICa ta usa 26 indicador dividi den siete categoria principal.

Den e clasificacion general, Jamaica a sali prome lugar, sigui pa Barbados. Aruba y Trinidad y Tobago ta comparti un puntuacion di 13,84, cu ta pone Aruba oficialmente na di cinco lugar. Curaçao ta sigui na di seis lugar, mientras cu Sint Maarten ta cay na di 16 lugar, convertiendo e den un di e economianan mas vulnerabel di region.

Segun e analisis, Aruba a logra su posicion relativamente fuerte principalmente door di su institucionnan, e fortaleza di e estado di derecho, GDP pa habitante relativamente halto y un inflacion stabiel. Ademas, e isla no ta situa den e zona principal di horcan, un factor cu reduci cierto riesgo natural compara cu diferente otro pais Caribe.

Sinembargo, e indice tambe a identifica diferente punto vulnerabel pa Aruba. E economia ta sigui depende hopi di turismo y importacion, loke ta haci cu e pais por sinti rapidamente impacto di crisis internacional, cambio den demanda turistico of problema den cadena di suministro. Ademas, Aruba tin un sector primario relativamente chikito y un proporcion limita di energia renovable, factornan cu, segun e estudio, ta reduci e nivel di resistencia economico na largo plaso.

E comparacion entre e tres paisnan autonomo den Reino ta mustra cu Aruba y Corsou ta comparti varios punto fuerte, incluyendo un sistema institucional relativamente solido y finanzas publico mas faborable cu hopi otro pais den Caribe. No obstante, Aruba ta supera Corsou den algun indicador economico, manera ingreso pa habitante y stabilidad di inflacion. Corsou, di otro banda, tin miho resultado den algun aspecto financiero y geografico, incluyendo un nivel di costo di interes pa gobierno mas abao.

Segun e estudio, un economia fuerte no ta depende di un solo factor. E paisnan cu logra e miho resultado generalmente ta sobresali riba diferente aspecto hunto, mientras cu e paisnan mas vulnerabel tin debilidad den varios area. Pa Aruba, e estudio ta señala cu tin espacio pa mehoracion door di aumenta participacion den mercado laboral, reduci emigracion netto y inverti mas den energia renovable. Ademas, diversificacion di economia y reduci dependencia di turismo y importacion por yuda fortalece e capacidad di Aruba pa enfrenta crisis economico y otro reto den futuro.